Së shpejti shërbime fetare islame edhe në ushtrinë gjermane

Mosmarrëveshja shumëjavore është gati për t’u zgjidhur. Ministria e Mbrojtjes po punon për të futur shërbime të kujdesit fetar për ushtarët myslimanë në Bundeswehr.

Eva Hogl është kryetare e Komisionit për Forcat e Armatosura të Bundestagut Gjerman. Detyra e saj është të dëgjojë shqetësimet dhe nevojat e ushtarëve gjermanë. Në mes të marsit, Hogl prezantoi raportin e saj të tretë vjetor si komisionere për çështjet ushtarake. Me rastin e prezantimit, ajo bëri thirrje përsëri për futjen e kujdesit fetar për myslimanët në ushtri.

Pavarësisht se cila parti e ka emëruar ministrin e Mbrojtjes në Gjermani, shpjegimi politik ka qenë gjithmonë: Nuk funksionon, ka mungesë të njerëzve nga pala myslimane. Por kjo nuk mjafton më për socialdemokraten Hogl. Ajo është shumë kritike.

"Mungesa e kujdesit të barabartë fetar për ushtarët e besimit islam është jashtëzakonisht e pakënaqshme", thotë ajo.

Prandaj ajo i bëri thirrje Ministrisë së Mbrojtjes që të vendosë shpejt kujdesin fetar përmes personelit përkatës në bazë të kontratës për shërbime.

Hogl kujton misionin e ndihmës së ushtrisë gjermane që zgjati disa javë në Turqinë juglindore pas tërmetit shkatërrues në shkurt të vitit 2023. Në atë kohë, në operacionin e shpëtimit morën pjesë edhe ushtarë myslimanë. Megjithatë, kujdesi fetar në misione u ofrua nga dy klerikë ushtarakë jomyslimanë. Një peticion drejtuar Komisionit të Forcave të Armatosura tregon se "anëtarët e Bundeswehr-it të besimit islam ndonjëherë janë ndjerë të lënë pas dore në lidhje me praktikën e tyre fetare".

3.000 myslimanë në forcat e armatosura

E pyetur nga Deutsche Welle, zëdhënësja e Ministrisë së Mbrojtjes u përgjigj se sipas një studimi të vitit 2023, numri i ushtarëve të fesë islame në Bundeswehr llogaritet në 3000 persona.

Pothuajse 25 vjet më parë, Qendra për Lidership të Brendshëm, e cila trajton edhe identitetin e Bundeswehr-it, prezantoi një punim të titulluar "Myslimanët në Bundeswehr". Thirrja për kujdes fetar islam është dëgjuar për më shumë se dhjetë vjet.

Edhe përfaqësuesit e komuniteteve të tjera fetare që veprojnë në kuadër të ushtrisë angazhohen për një ofertë të kualifikuar për ushtarët e fesë islame. Peshkopi ushtarak protestant Bernhard Felmberg thotë për DW se atij dhe kapelanëve ushtarakë protestantë i janë drejtuar ushtarë të cilët flasin për nevojën e kujdesit fetar. Ai thotë se këto nevoja duhet të merren në konsideratë.

Sipas Felmberg, kujdesi fetar garanton lirinë fetare të garantuar me kushtetutë për ushtarët që kryejnë shërbimin ushtarak. "Meqenëse myslimanët po shërbejnë gjithnjë e më shumë në Bundeswehr, unë mbështes fuqimisht propozimet që t'u jepet këtyre ushtarëve mundësia për të marrë kujdesin baritor në besimin e tyre," thotë ai. Deklarata të ngjashme janë bërë muajt e fundit nga përfaqësues katolikë e hebrenj brenda ushtrisë.

SHBA dhe Kanadaja, Franca dhe Holanda, Zvicra, Austria dhe Norvegjia kanë futur ndërkohë edhe shërbimet e kujdesit fetar për ushtarët e fesë islame. Ata kanë angazhuar kryesisht imamë ushtarakë. Në Gjermani, nga ana tjetër, nuk ka kontratë shtetërore për këtë, sepse nuk ka një organizatë ombrellë që përfaqëson të gjitha drejtimet e besimit islam. Sa për krahasim: Futja e kujdesit ushtarak hebre në vitin 2019 ishte e mundur sepse u krijua Këshilli Qendror i Hebrenjve si një institucion, i cili mund të negocionte në emër të rrymave të ndryshme të kësaj feje në Gjermani. Në përgjithësi supozohet se asokohe kishte deri në 500 anëtarë hebrenj të Bundeswehr-it.

Presioni i partive në pushtet

Por tre anëtarët e pative të koalicionit në pushtet në Berlin tani shohin një situatë ndryshe. Nënkryetari i grupit parlamentar të FDP në Bundestag Konstantin Kuhle, zëvendëspresidentja e Bundestagut Aydan Özoguz (SPD) dhe Filis Polat, nga ekologjistët, i bënë thirrje qeverisë federale në maj 2023 që të vendosë kujdesin ushtarak islamik në Bundeswehr. Kujdesi fetar për myslimanët duhet të ketë "një prioritet të lartë për ne”, thanë ata. Të tre kujtojnë se të diplomuarit e parë të Kolegjit Islamik të Gjermanisë (Islamkolleg Deutschland - IKD), në Osnabrück përfunduan trajnimin e tyre për shërbim fetar islam në gjuhën gjermane në shkurt 2023.

Dy muaj më vonë, sipas informacioneve të Deutsche Welle, për këtë çështje është deklaruar edhe ministri i Mbrojtjes Boris Pistorius. Ai tha se kjo temë është veçanërisht e rëndësishme për të. Kjo është arsyeja pse ai tashmë ka miratuar futjen e një "oferte fetare" të përshtatshme për myslimanët në ushtrinë gjermane. Kjo, siç tha ai më tej, duhet të ndodhë gjatë mandatit të kësaj qeverie. Ministria e Mbrojtjes është, sipas ministrit, në kontakt me Kolegjin Islamik lidhur me këtë çështje.

Kolegji Islamik, i themeluar në fund të vitit 2019, nuk është i vetmi vend në Gjermani ku trajnohen imamët dhe stafi fetar islam, për të shërbyer në Gjermani. Por politikanët mendojnë se ky Kolegj është më i përshtatshmi.

"Nuk ka ushtarë të klasit të dytë"

"Për vite me radhë kemi dëshiruar vendosjen e kujdesit fetar për myslimanët në ushtri”, tha drejtori i IKD-së, Buelent Ucara për Deutsche Welle-n. Pedagogu fetar islam në mënyrë eksplicite i referohet shqetësimit aktual fetar në rritje për hebrenjtë në ushtri.

Pala myslimane do të donte të kishte "burime materiale dhe personel të njëjtë ose të ngjashëm sikur ata". Këto çështje nuk duhet domosdoshmërisht të rregullohen me një traktat ndërkombëtar, por ato duhet të sqarohen menjëherë. Punonjësit myslimanë në Bundeswehr "nuk janë ushtarë të klasit të dytë apo të tretë", paralajmëron Ucar, i cili ka lindur në Oberhausen. Shteti, thotë ai, duhet të sigurojë kujdes fetar edhe për myslimanët.

Që nga mesi i marsit, një ekspert i ministrisë ka paraqitur një ofertë të veçantë të kujdesit fetar për myslimanët në Bundeswehr, tha për DW një zëdhënëse e Ministrisë së Mbrojtjes. Ky "fillim themelor”, siç tha ajo, synon të zgjerojë kujdesin ekzistues fetar.