ISW-ja paralajmëron një skenar të mundshëm: Rusia po përgatitet për një konflikt në shkallë të gjerë me NATO-n
Disa tregues financiarë, ekonomikë dhe ushtarakë sugjerojnë se Rusia po përgatitet për një “konflikt konvencional në shkallë të gjerë me NATO-n”, njoftoi një ekip ekspertësh nga Instituti Amerikan për Studimin e Luftës (ISW) pretendon se një konflikt i tillë mund të ndodhë në një afat të shkurtër, “jo menjëherë, por ndoshta në një kornizë kohore më të shkurtër se sa supozuan fillimisht disa analistë perëndimorë”, raporton SkyNews.
Është vënë re se veprimet e presidentit rus Vladimir Putin gjatë viteve të fundit dhe fjalimet e fundit në të cilat ai përvijonte planet e tij për mandatin e tij të pestë presidencial të siguruar së fundmi, synonin stabilizimin e së ardhmes financiare afatgjatë të Rusisë.
“Përpjekjet e Putinit për të vendosur kushtet për stabilizimin e ekonomisë dhe financave ruse janë me shumë gjasa pjesë e… përgatitjeve për një konflikt të mundshëm të ardhshëm në shkallë të gjerë me NATO-n, jo vetëm një luftë të zgjatur në Ukrainë”, vlerësoi ISW-ja.
Organizata i referohet gjithashtu komenteve të djeshme të presidentit polak Andrzej Duda, i cili sugjeroi se Rusia po kalon në një ekonomi lufte “me synimin për të qenë në gjendje të sulmojë NATO-n që në vitin 2026 ose 2027”.
U vunë në dukje edhe fjalët e ministrit danez të Mbrojtjes Troels Lund Poulsen më 9 shkurt se “të dhënat e reja të inteligjencës tregojnë se Rusia mund të përpiqet të sulmojë një vend të NATO-s brenda tre deri në pesë vjet”.
“Ristrukturimi i ushtrisë dhe ndryshimet në legjislacion, të cilat tashmë janë raportuar nga mediat e huaja, i hapin rrugën suksesit afatshkurtër në Ukrainë dhe e përgatisin Rusinë për një konflikt me NATO-n në të ardhmen”, paralajmëroi ISW.
“Ndryshimet e vazhdueshme të personelit brenda Ministrisë ruse të Mbrojtjes mund të jenë tregues të mëtejshëm të përgatitjeve të Rusisë për një konflikt afatgjatë”, shtoi ai.
Udhëheqja e re do të trajtojë “çështjet logjistike për të mbështetur reformat e vazhdueshme ushtarake konvencionale, duke vendosur terrenin për përpjekjet afatgjata për të ndërtuar aftësitë konvencionale të Rusisë”, thuhet në analizë.
