Kardinali gjerman akuzohet për abuzim seksual, ka edhe dëshmitarë

Një nga personalitetet më të shquara të kishës në historinë e pasluftës së Gjermanisë dyshohet për abuzim. Kardinali Franz Hengsbach u akuzua për sulme seksuale ndaj të miturve gjatë viteve 1950 dhe 1960.

Kardinali është ende i popullarizuar sot dhe u bë i famshëm gjatë tre dekadave që kaloi në krye të dioqezës së Essenit, kryesisht si një avokat për të drejtat e minatorëve në zonën e Ruhr. Hengsbach e themeloi atë dioqezë në vitin 1958, nga pjesë të dioqezave të Këlnit, Münsterit dhe Paderbornit. Ai ishte në krye të saj për 33 vjet, deri në vdekjen e tij në 1991. Më parë, ai ishte peshkop ndihmës në Paderborn.

Pasi tre persona kanë dalë tashmë me akuza kundër tij, Dioqeza e Essenit ka publikuar ato që sipas tyre janë “akuza të rënda”. Në të njëjtën kohë, viktima të tjera të mundshme u ftuan të paraqiten. Sipas dioqezës, akuza më e fundit është bërë në tetor 2022 dhe dy të tjera datojnë në vitin 2011. Dioqeza nuk ka dhënë asnjë informacion për natyrën e sulmeve, gjë që e shpjegoi duke mbrojtur të drejtat personale të të prekurve.

Akuzat drejtohen kundër dy peshkopëve të tjerë gjermanë: ish-peshkop Emil Stele (1926-2017) nga Kryedioqeza e Freiburgut dhe ish-peshkopi i Hildesheim, Heinrich Maria Jansen (1907-1988).

Nisi hetimet

Akuzat që iu raportuan personave të pavarur kontaktues të Dioqezës së Essen vjeshtën e kaluar i referohen vitit 1967, njoftoi dioqeza. Si rezultat, peshkopi aktual i Essenit, Franz-Joseph Overbeck, nisi hetime të mëtejshme – duke përfshirë një në dioqezën e shtëpisë së Hengsbach në Paderborn.

Kur shqyrtoi dosjen e Paderborn, ekipi hetimor i Essen-it hasi në një shënim ku thuhej se Hengsbach u akuzua në vitin 2011 për abuzim seksual me një adoleshent të mitur në vitin 1954, ndërsa ai ishte peshkop ndihmës. Në atë kohë, Vatikani vlerësoi se akuzat ishin të pabesueshme, por pas hetimeve të fundit, ato u vlerësuan si të besueshme, njoftoi kryepeshkopata e Paderbornit.

Raste të shumta

Gjithashtu, një grua deklaroi se në vitin 1954, kur ishte 16 vjeç, ajo ishte abuzuar seksualisht nga Franz Hengsbach dhe vëllai i tij Paul. Vëllai, i cili vdiq në vitin 2018 dhe ishte gjithashtu prift në kryepeshkopatë, i mohoi me forcë akuzat.

Kryedioqeza tani thotë se akuzat në vitin 2011 u konsideruan të pabesueshme “për shkak të rrethanave të përgjithshme në atë kohë”, por se nga këndvështrimi i sotëm dhe pas rishqyrtimit të dosjeve personale të Paul Hengsbach, ky vlerësim “për fat të keq duhet të vihet qartë në dyshim”.

Një tjetër grua ka bërë gjithashtu akuza për abuzim ndaj tij në vitin 2010, sipas dosjeve. Ai rast u klasifikua si “jomaterial” dhe nuk iu paraqit Romës, thuhet në deklaratë. Megjithatë, pas një apeli dhe shqyrtimi të rastit të saj, e prekura mori një pagesë nga kisha në vitin 2019 si kompensim për vuajtjet.

Pretendimi i tretë, i bërë gjithashtu në vitin 2011, u tërhoq në vitin 2014 me iniciativën e personit të interesuar, shton dioqeza e Essenit. Thuhet se “përshkrimet e saj kanë qenë të pasakta për shkak të kujtimeve të mjegullta” ndaj dhe çështja konsiderohet e mbyllur.

Duke marrë parasysh njohuritë e reja, peshkopi aktual i Essen Overbeck vendosi t’i bëjë publike të gjitha akuzat kundër Hengsbach. Ai është i vetëdijshëm, thotë ai, se si kjo do të ndikojë shumë njerëz që e kujtojnë Hengsbach-un si një peshkop të respektuar dhe themelues të dioqezës së Ruhrit. Por, “duke pasur parasysh akuzat aktuale, është e rëndësishme për mua të inkurajoj viktima të tjera të mundshme që të dalin përpara”.