SHBA-ja i kundërpërgjigjet Iranit, vret 19 anëtarë të grupeve të lidhura me Republikën Islamike

Numri i të vdekurve nga sulmet hakmarrëse të SHBA-së ndaj grupeve të lidhura me Iranin në Siri pas një sulmi vdekjeprurës me dron është rritur në 19, tha një vëzhgues i luftës, teksa Uashingtoni këmbënguli se nuk po kërkonte konflikt me Teheranin.

Uashingtoni kreu sulmet fillestare pasi një kontraktor amerikan vdiq – dhe një tjetër kontraktor dhe pesë personel ushtarak u plagosën – nga një dron me origjinë iraniane që goditi një bazë të koalicionit të udhëhequr nga SHBA-ja pranë Hasakeh në Sirinë veri-lindore.

Sekretari amerikan i mbrojtjes, Lloyd Austin, tha se me urdhër të presidentit Joe Biden, ai kishte urdhëruar sulme ajrore precize në Sirinë lindore kundër objekteve të përdorura nga grupet e lidhura me Korpusin e Gardës Revolucionare Islamike të Iranit.

Të shtunën, observatori me bazë në Britani, i cili ka një rrjet të gjerë burimesh në terren, tha se 19 njerëz u vranë në valën e parë të sulmeve të SHBA-së; tre ushtarë të regjimit sirian dhe 16 anëtarë të forcave të mbështetura nga Irani, duke përfshirë 11 shtetas sirianë.

Pas sulmeve, Biden u përpoq të ulte tensionet, duke thënë se SHBA “nuk kërkon konflikt me Iranin, por është e përgatitur të veprojë me forcë për të mbrojtur popullin tonë”.

Disa orë pas sulmeve, 10 raketa u hodhën ndaj forcave amerikane dhe të koalicionit në bazën e fshatit Green në veri-lindje të Sirisë, tha Komanda Qendrore e SHBA-së (Centcom). Nuk pati lëndime apo dëmtime në objektet në bazë, por një raketë goditi një shtëpi rreth pesë kilometra larg, duke shkaktuar plagë të lehta në dy gra dhe dy fëmijë.

Milicitë e lidhura me Gardën Revolucionare të Iranit kanë një prani të madhe në të gjithë Sirinë, veçanërisht rreth kufirit me Irakun dhe në jug të Eufratit në provincën Deir Ezzor, ku u zhvilluan sulmet e fundit të SHBA-së.

SHBA-ja ka rreth 900 trupa në poste në të gjithë Sirinë verilindore për të mbajtur presionin mbi mbetjet e grupit të Shtetit Islamik dhe për të mbështetur Forcat Demokratike Siriane të udhëhequra nga kurdët, të cilat kontrollojnë pjesën më të madhe të verilindjes, shkruan Guardian.

Pentagoni tha se dy avionë luftarakë F-15 nisën sulmin hakmarrës, për të cilin zëdhënësi Pat Ryder tha se ishte për të mbrojtur personelin amerikan.

“Sulmet kishin për qëllim të dërgonin një mesazh shumë të qartë se ne do ta marrim seriozisht mbrojtjen e personelit tonë dhe se do të përgjigjemi shpejt dhe me vendosmëri nëse kërcënohen”, tha ai.

Personeli amerikan në Siri ka qenë shpesh në shënjestër të sulmeve nga grupet e milicisë që Shtetet e Bashkuara thonë se mbështeten nga Teherani.