Turqia vonon procesin e anëtarësimit në NATO, ministri finlandez: Të turpëruar shumë anëtarë

Shumë anëtarë të Organizatës së Traktatit të Atlantikut të Veriut janë të turpëruar nga fakti se Turqia po vonon ratifikimin e aplikimit finlandez-suedez për anëtarësim në NATO, tha ministri i jashtëm finlandez Pekka Haavisto në një konferencë për shtyp të mërkurën.

“Sa i përket Turqisë, qëllimi është që shumë shpejt të mbahet takimi i radhës trepalësh me Turqinë dhe Suedinë. Ne nuk jemi vetëm në këtë çështje. Shumë vende të NATO-s e shohin situatën pak të vështirë dhe të sikletshme për sa i përket politikës së dyerve të hapura të NATO-s”, tha Haavisto.

Duke iu referuar sulmeve me raketa në territorin polak, Haavisto tha se është e rëndësishme të zbulohet nëse ajo që ndodhi ishte një aksident apo diçka e qëllimshme.

“Vëzhgimet më të rëndësishme që nga dje janë vdekjet e raportuara në Poloni. Por sulmet e Rusisë ndaj Ukrainës janë po aq tragjike. Dje, Rusia nisi më shumë se 100 sulme raketore në Ukrainë, shumica e të cilave synonin infrastrukturën energjetike. Është shumë serioze. Sulmet që synojnë civilët janë krime lufte”, shtoi ministri finlandez. /abcnews.al