Trump: Kompanitë amerikane duhet t’u japin fund lidhjeve me “TikTok”-un dhe “WeChat”-it

Trump: Kompanitë amerikane duhet t’u japin fund lidhjeve me “TikTok”-un dhe “WeChat”-it

Bota August 07, 2020 - 08:53

Presidenti i Shteteve të Bashkuara, Donald Trump, ka nënshkruar urdhra ekzekutivë që shënjestrojnë “TikTok”-un dhe “WeChat”-in, dy nga aplikacionet më të mëdha të Kinës.

Në bazë të këtyre urdhrave, pas 45 ditësh ndalohen transaksionet e kompanive amerikane me pronarët kinezë të “TikTok”-ut dhe “WeChat”-it.

Trumpi përmendi shqetësimet e sigurisë kombëtare. Ai tha që “TikTok”-u mund të përdoret për fushatat dezinformuese në dobi të Partisë Komuniste Kineze.

"Aplikacioni ‘Tiktok’ është vlerësuar si një kërcënim për sigurinë kombëtare dhe Shtetet e Bashkuara duhet të ndërmarrin veprime agresive kundër pronarëve të ‘TikTok’-ut”, thuhet në urdhër.

Në urdhrin tjetër ekzekutiv Trumpi tha se “WeChat” automatikisht regjistron të dhënat nga përdoruesit e tij.

"Kjo mbledhje e të dhënave përbën kërcënim pasi Partia Komuniste Kineze ka qasje në informacionet personale dhe pronësore të amerikanëve", thuhet në urdhër.

Trumpi në fillim të kësaj jave kërcënoi se do të mbyllte “TikTok”-un në SHBA, përveç nëse operacionet e tij amerikane shiten te ndonjë kompani amerikane.

Kompania amerikane “Microsoft” ka thënë se është në diskutime për një blerje të tillë.

“TikTok”-u është veçanërisht i popullarizuar tek adoleshentët dhe audienca e re, të cilët e përdorin atë për të krijuar dhe shikuar videot e saj në formë të shkurtër. Ka rreth 1 miliard përdorues në të gjithë botën.

Kompania insiston se nuk i ndan të dhënat e përdoruesit me Pekinin.

Më 6 gusht Senati amerikan votoi për të miratuar një projektligj, që ndalon punonjësit federalë të përdorin “TikTok”-un në pajisjet qeveritare.