Evropa, drejt kufizimit të rrjeteve sociale për fëmijët

Vende evropiane si Franca, Spanja, Italia, Greqia dhe Gjermania po shqyrtojnë kufizimet mbi ndalimet e fëmijëve në rrjetet sociale.

Pas ndalimit të rrjeteve sociale për fëmijët nën 16 vjeç në Australi, gjë që ndodhi në fillim të këtij muaji, vendet evropiane po diskutojnë nëse duhet të zbatojnë kufizime të ngjashme.

Që nga 10 dhjetori, fëmijët australianë nën 16 vjeç nuk mund të krijojnë ose të mbajnë më llogari në rrjetet sociale në platforma, si Facebook, X, Threads, Snapchat, Instagram, TikTok, Twitch, Reddit dhe YouTube.

Nëse këto platforma zbulohen se shkelin ligjin, ato mund të përballen me gjoba të ashpra prej 50 milionë dollarësh australianë (28 milionë euro).

Por, çfarë po bëjnë kombet evropiane për të kufizuar rrjetet sociale për fëmijët në internet?

Danimarka

Në nëntor, qeveria daneze ka thënë se ka siguruar një marrëveshje nga të gjitha partitë politike për të ndaluar qasjen në disa faqe të rrjeteve sociale për ata nën moshën 15 vjeç.

Masa ka për qëllim “të mbrojë fëmijët dhe të rinjtë në botën digjitale”, nga platformat që mund t’i ekspozojnë ata ndaj përmbajtjeve të dëmshme.

Caroline Stage, ministrja e Danimarkës për çështjet digjitale, ka thënë për Associated Press se ligjvënësve mund t’u duhen muaj për të miratuar legjislacionin përkatës për ndalim.

Danimarka planifikon të krijojë një aplikacion për verifikimin e moshës, megjithatë nuk specifikon se si do të zbatohej një ndalim i mundshëm.

Franca

Anne Le Hénanff, ministrja franceze e çështjeve digjitale, ka thënë për gazetën franceze La Dépèche se departamenti i saj dëshiron të paraqesë një projektligj për të kufizuar rrjetet sociale për ata nën moshën 15 vjeç në muajt e parë të vitit 2026.

Ky veprim vjen pasi një komision parlamentar francez publikoi një raport në shtator që rekomandoi ndalimin e rrjeteve sociale për fëmijët nën 15 vjeç.

Raporti i komisionit u publikua në fillim të këtij viti pasi shtatë familje franceze paditën TikTokun në vitin 2024, duke e akuzuar platformën se i ekspozonte fëmijët e tyre ndaj përmbajtjes që inkurajon vetëvrasjen.

Në Francë, fëmijët nën 15 vjeç kanë nevojë për pëlqimin e qartë prindëror për të hapur një llogari në rrjetet sociale. Prindërit gjithashtu mund të kërkojnë që llogaria e fëmijës së tyre të mbyllet.

Spanja

Një projektligj që po studiohet nga ligjvënësit spanjollë sugjeron që fëmijët nën 16 vjeç nuk duhet të hyjnë në rrjetet sociale, platformat e komunikimit ose “çdo hapësirë virtuale që përfshin inteligjencën artificiale gjeneruese (GenAI)”, pa pëlqimin e qartë të prindërve.

Një sondazh i kohëve të fundit nga YouGov zbuloi se 79 për qind e prindërve spanjollë pajtohen me kufizim të moshës në stilin australian për rrjetet sociale.

Megjithatë, një në tre të anketuar thanë se një kufizim moshe do të ishte i vështirë për t’u zbatuar në Spanjë.

Italia

Majin e kaluar, parlamenti italian prezantoi një projektligj që mund të vendosë kufizime në rrjetet sociale për fëmijët nën 15 vjeç.

Ligji, i cili po studiohet nga Senati italian, përfshin gjithashtu ligje për të kufizuar “kidfluencers” apo ndikimin e fëmijëve nën moshën 15 vjeç në platformat e rrjeteve sociale.

Ministri i Arsimit i Italisë, Giuseppe Valditara, i tha gazetës italiane Il Foglio se vendi duhet të ndjekë modelin australian.
Kufizimet në Itali mund të vijnë potencialisht nga një padi kolektive në pritje e ngjashme me atë franceze, ku një grup familjesh italiane paditën TikTok dhe platformat Meta, Facebook dhe Instagram.

Padia pretendon se më shumë se 3.5 milionë fëmijë të moshës shtatë deri në 14 vjeç përdorin platformat pavarësisht se janë shumë të vegjël.

Një nga qëllimet e padisë është t’i detyrojë kompanitë e teknologjisë të zbatojnë praktika më të rrepta të verifikimit të moshës për t’u siguruar që më pak fëmijë nën 14 vjeç të jenë në gjendje të hyjnë në platformat e tyre.

Greqia

Në shtator, kryeministri grek Kyriakos Mitsotakis i tha Asamblesë së Përgjithshme të OKB-së se vendi po shqyrton një ndalim të rrjeteve sociale të ngjashëm me modelin australian.

“Nuk e dimë se cilat do të jenë pasojat, por jemi pothuajse të sigurt se ato nuk do të jenë pozitive”, cituan mediat lokale të ketë thënë Mitsotakisi.

Greqia tashmë ka ndaluar përdorimin e telefonave inteligjentë në klasë, gjë që Mitsotakis tha se ka pasur efekt transformues te fëmijët.

Qeveria gjithashtu lansoi një faqe interneti vitin e kaluar që u jep prindërve udhëzime se si të aktivizojnë kontrollet prindërore në telefonat celularë iOS dhe Android.

Gjermania

Në Gjermani nuk ka kufizime në rrjetet sociale për personat nën 16 vjeç – të paktën jo ende, sipas Parlamentit gjerman.

Qeveria ka njoftuar në nëntor se i ka kërkuar një komisioni të studionte nëse një ndalim mund të zbatohej në Gjermani, së bashku me mënyrën se si rrjetet sociale ndikojnë tek adoleshentët e Gjermanisë në një kuptim më të gjerë. Ajo do të paraqesë një raport përfundimtar mbi këtë në vjeshtën e vitit 2026.

Një peticion që kërkon një moshë minimale ligjore prej 16 vjeç për faqet e mediave sociale mori mbi 34,000 nënshkrime dhe po shqyrtohet nga qeveria.