Gjykata amerikane do t’i dëgjojë sfidat për ndalimin e mundshëm të TikTok-ut në shtator

Një gjykatë apeli në SHBA vendosi të martën një plan të shpejtë, për të shqyrtuar sfidat ligjore ndaj një ligji të ri që kërkon që ByteDance me seli në Kinë të heqë asetet e TikTok-ut në SHBA deri më 19 janar ose të përballet me një ndalim.

Gjykata e Apelit e SHBA për Distriktin e Kolumbisë urdhëroi që çështja të vendoset për argumente gojore në shtator pasi TikTok-u, ByteDance dhe një grup krijuesish të përmbajtjes TikTok u bashkuan me Departamentin e Drejtësisë në fillim të këtij muaji, për t’i kërkuar gjykatës një orar të shpejtë.

Më 14 maj, një grup krijuesish të TikTok-ut ngritën padi për të bllokuar ligjin që mund të ndalonte aplikacionin e përdorur nga 170 milionë amerikanë, duke thënë se ka pasur “një efekt të thellë në jetën amerikane” pasi TikTok-u dhe kompania mëmë ByteDance ngritën një padi të ngjashme.

Sipas orarit të gjykatës së apelit, krijuesit, TikTok-u dhe ByteDance duhet të dorëzojnë dokumente ligjore deri më 20 qershor dhe Departamenti i Drejtësisë deri më 26 korrik, me përgjigjet që pritet t’i marrin deri më 15 gusht.

TikTok-u tha se me një orar të shpejtë beson se sfida ligjore mund të zgjidhet pa pasur nevojë të kërkojë ndihmë paraprake urgjente.

TikTok dhe Departamenti i Drejtësisë kanë kërkuar një vendim deri më 6 dhjetor, në mënyrë që të kërkojnë rishikim nga Gjykata e Lartë nëse është e nevojshme.

Ligji, i nënshkruar nga presidenti Joe Biden më 24 prill, i jep afat ByteDance deri më 19 janar për të shitur TikTok ose do të përballet me një ndalim.

Shtëpia e Bardhë thotë se dëshiron të shohë që pronësia me seli në Kinë të përfundojë për arsye të sigurisë kombëtare, por jo një ndalim të TikTok-ut. /Telegrafi