BE-ja nis procedurat ndaj platformës “X” për dezinformata

Bashkimi Evropian formalisht ka njoftuar se dyshon se platforma “X”, që më herët njihej si “Twitter”, është duke i thyer rregullat në disa fusha, përfshirë edhe në luftën kundër përmbajtjes së paligjshme dhe dezinformimit.

Komisioneri digjital Thierry Breton ka treguar për shkeljet e supozuara në një postim të bërë në rrjete sociale.

Ai tha se “X”, që është në pronë të Elon Musk, dyshohet se ka shkelur detyrimet e saj sa i përket transparencës.

“X” ka thënë se “po bashkëpunon me rregullatorët”.

Në një deklaratë kompania tha se “është e rëndësishme që ky proces të mbetet pa ndikim politik”.

“’X” është fokusuar një krijimin e një mjedisi të sigurtë dhe gjithëpërfshirës për gjithë përdoruesit e platformës sonë, duke mbrojtur lirinë e shprehjes dhe ne do të vazhdojmë të punojmë drejt realizimit të këtij qëllimi’”, thuhet në deklaratën e platformës “X”.

Këto janë hapat e parë formalë të filluar sipas Aktit të Shërbimit Dixhital (DSA), rregullat e reja të ashpra që ka prezantuar Bashkimi Evropian, për kompanitë e mëdha teknologjike.

DSA-ja vendos detyrime shtesë për kompanitë e mëdha që të mbrohen përdoruesit nga përmbajtja ekstreme. Nëse nuk e bëjnë këtë, atëherë mund të përballen me gjoba të mëdha apo pezullohen.