Mos harroni: Bëjeni këtë në llogarinë tuaj në Google para datës 1 dhjetor

Në dhjetor, Google do të fshijë miliona llogari për shërbimet e Gmail, Drive dhe Photo, si pjesë e një mase sigurie për të mbrojtur përdoruesit.

Nisma synon të adresojë cenueshmërinë e llogarive joaktive, të cilat mund të mbështeten në fjalëkalime të vjetruara ose të ripërdorura dhe nuk kanë vërtetim me dy faktorë.

Google thekson se këto llogari të neglizhuara janë të prekshme ndaj kompromisit dhe sulmeve me qëllim të keq, gjë që dërgon në rreziqe të mundshme si vjedhja e identitetit, ose bëhet një kanal për rrjedhën e përmbajtjes me qëllim të keq, si p.sh. spam.

Procesi i fshirjes do të fokusohet në llogaritë e Google që kanë qenë joaktive për dy vjet, duke përfshirë të dhënat brenda Google Workspace – Docs, Drive, Meet, Calendar dhe Google Photos. Është e rëndësishme të theksohet se këto udhëzime zbatohen vetëm për llogaritë personale të përdoruesve të Google, dhe jo për llogaritë e kompanive, shkollave dhe subjekteve të tjera.

Fshirja me faza do të fillojë fillimisht me llogaritë që janë krijuar, por nuk janë përdorur më. Google planifikon të njoftojë disa herë pronarët e llogarisë përmes adresave të tyre të emailit të regjistruara, për të dhënë një paralajmërim të mjaftueshëm përpara fshirjes.

Si të ruani llogarinë tuaj?

Për të mbajtur llogarinë aktive dhe për të shmangur fshirjen, përdoruesit këshillohen të identifikohen të paktën një herë në dy vjet. Aktivitetet që konsiderohen si përdorim i llogarisë përfshijnë: leximin ose dërgimin e emaileve, përdorimin e “Diskut të Google”, shikimin e videove në YouTube, shkarkimin e aplikacioneve nga “Dyqani i Google Play”, kryerja e kërkimeve në Google dhe përdorimi i veçorisë “Identifikohu me Google” për aplikacione ose shërbime të jashtme.

Përveç kësaj, abonimet ekzistuese që janë të lidhura me një llogari Google kontribuojnë në ruajtjen e statusit aktiv të llogarisë.

Kjo qasje proaktive inkurajon mbajtësit e llogarive që të përdorin rregullisht shërbimet e tyre të Google, duke rritur sigurinë e llogarisë dhe duke parandaluar sulmet e mundshme me qëllim të keq për shkak të pasivitetit të zgjatur. /Telegrafi