“Apple” lanson në disa vende funksionin e dërgimit të mesazhit përmes satelitit

"Apple" po përpiqet t’u japë përdoruesve të "iPhone"-it një masë sigurie edhe kur ata ndodhen në një zonë pa shërbim celular.

Të martën, kompania lansoi shërbimin emergjent SOS përmes satelitit, që u lejon përdoruesve t’u shkruajnë shërbimeve të urgjencës, në zonat pa sinjal.

Shërbimi është i disponueshëm për klientët e iPhone 14 dhe është falas për dy vjetët e para.

Apple njoftoi funksionin e urgjencës në shtator, kur prezantoi linjën e iPhone 14. Për të mundësuar shërbimin, Apple tha javën e kaluar se do të shpenzonte 450 milionë dollarë me kompanitë amerikane, derisa pjesa më e madhe të parave do të shkojë për Globalstar, një operator satelitor me bazë në Luiziana.

Shërbimi do të funksionojë për të gjithë përdoruesit e iPhone 14. Ata duhet ta drejtojnë telefonin e tyre drejt qiellit për ta lidhur me një nga 24 satelitët Globalstar në orbitën e ulët të Tokës.

Ndonëse para ca ditësh shërbimi u lansua për konsumatorët në SHBA dhe Kanada, funksioni do të lansohet në dhjetor për vendet sikurse Franca, Gjermania, Irlanda dhe Mbretëria e Bashkuar.

Sipas Apple, kjo teknologji inovative do të lejojë përdoruesit të dërgojnë mesazhe me shërbimet e urgjencës në zonat pa sinjal celulari ose të Wi-Fi-s. Gjithashtu, nëse përdoruesit duan të sigurojnë miqtë dhe familjen për vendndodhjen e tyre gjatë udhëtimit në një zonë pa sinjal, ata tani mund të hapin aplikacionin “Find My” dhe të ndajnë vendndodhjen përmes satelitit.

Kompania thotë se nuk duhet ta testoni në qoftë se nuk keni me të vërtet nevojë për ndihmë. /telegrafi