Rusët kërcënojnë Elon Muskun, miliarderi: Nëse vdes mistershëm, gëzohem që u njohëm
CEO i Tesla-s, Elon Musk, është kërcënuar me vdekje nga kreu i Agjencisë Hapësinore të Rusisë, Dimitry Rogozin, për përpjekjet e tij që të sigurojë shërbim interneti për Ukrainën.
50-vjeçari Musk ka përdorur një rrjet me mbi 2000 satelitë që orbitojnë rreth botës, për të lëshuar sinjal interneti në vendin e pushtuar nga Rusia. Miliarderi ka deklaruar se i ka rezistuar përpjekjeve të hakerave rusë për të bllokuar rrjetin e tij.
Musk publikoi mesazhin e Rogozin, i cili e akuzon sipërmarrësin se i ka dhënë shërbim interneti Batalionit Azov, që konsiderohet si grupim neonazist nga rusët. “Elon Musk është i përfshirë në dhënien e ndihmës ushtarake ndaj forcave fashiste në Ukrainë. Dhe për këtë, duhet të përgjigjesh si i rritur Elon, pavarësisht se luan rolin e budallait”.
Më pas, Musk postoi një mesazh në Twitter: “Nëse vdes në mënyrë të mistershme, gëzohem që u njohëm”, duke marrë përgjigje të shumta nga ndjekësit, përfshi edhe nga mamaja Maye. “Nuk është për të qeshur”, i shkroi ajo.
Satelitët e Musk kanë ndihmuar Ukrainën jo vetëm për të marrë shërbim interneti, por edhe për të fituar luftën e dronëve me Rusinë, që kur më 24 shkurt Putin urdhëroi futjen e trupave në shtetin fqinj.
SpaceX ka ngritur më shumë se 2000 satelitë në hapësirë dhe shpreson që brenda vitit 2026 kjo shifër të arrijë deri në 12 mijë, dhe të thyejë paragjykimin që interneti satelitor është i ngadaltë dhe me shkëputje. Më parë, Musk ka deklaruar se synimi i tij është që të ofrojë internet për 3 miliardë persona dhe në të ardhmen t’i përdorë për ndërtimin e një qyteti me njerëz në Mars.
