Gjendet i vdekur studenti shqiptar në Itali pas 20 ditësh kërkime, babai e identifikon nga tatuazhi

“Si je?” “Ende gjallë”. Është ora 19:16 e 30 gushtit. Ky do të ishte mesazhi i fundit i të riut shqiptar Ferdinand Nokajt, 25 vjeç, i lindur në Fano të Italisë, banues me familjen në Colli al Metauro dhe prej pesë vitesh në Rovereto për të studiuar psikologji. Atë mbrëmje Ferdinandi zhduket, shkruajnë mediat italiane.

Të nesërmen, vëllai i tij denoncon zhdukjen e tij te karabinierët e Fanos. Pesë ditë më vonë, më 5 shtator, trupi i tij gjendet në brigjet e lumit Adige, në Grumo, në komunën e San Michele all’Adige, rreth 42 kilometra nga Rovereto. Por askush nuk e kishte identifikuar dhe familja vazhdoi ta kërkonte edhe për njëzet ditë të tjera. I ati bënte vazhdimisht rrugën drejt Trentinos, pa e ditur se i biri ndodhej tashmë në morgun e spitalit Santa Chiara të Trentos. Ai e njohu vetëm më 25 shtator, të premten e kaluar.

Ferdinandi i kishte treguar familjes se ishte sulmuar

Tri orë para atij mesazhi të fundit “ende gjallë”, Ferdinandi i kishte treguar familjes se ishte sulmuar në Rovereto nga disa djem shqiptarë. Kishte shenja në fytyrë dhe, mbi të gjitha, kishte frikë. Babai i kishte thënë të shkonte menjëherë te karabinierët. “Kjo është ajo që po mendoj të bëj, babi”, i ishte përgjigjur Ferdinandi.

Nuk rezulton të ketë shkuar ndonjëherë atje. Në orën 17:21 kishte folur sërish me vëllanë nga stacioni hekurudhor i Roveretos. Vëllai mendonte se ai donte të kthehej në shtëpi. Në orën 19:16 e pyet si është. “Ende gjallë”.

Pas kësaj, Ferdinandi nuk u përgjigj më. Për vdekjen e të riut po heton Prokuroria e Trentos, e cila ka hapur një dosje për nxitje të vetëvrasjes.

Ferdinandi kishte lindur në Fano dhe jetonte me familjen në Colli al Metauro

Ferdinandi ka lindur në Fano, ndërsa familja jeton në Colli al Metauro. Prej pesë vitesh banonte në Rovereto, ku ndjek masterin në Shkencat Konjitive në fakultetin e psikologjisë. Ndërkohë, gjatë verës, punonte në një piceri. Më 30 gusht prindërit erdhën në Shqipëri. Babai tregoi se Ferdinandi, gjatë pasdites, i kishte rrëfyer se ishte grindur me disa djem shqiptarë dhe se ishte sulmuar.

Pas sulmit, Ferdinandi publikoi edhe një ‘Story’ në Instagram, nga e cila familja ka ruajtur një screenshot: në fytyrën e të riut duken shenja. Të nesërmen, vëllai shkon te karabinierët e Fanos dhe denoncon zhdukjen. Verifikimet mbi telefonin çojnë deri në Termeno sulla Strada del Vino, në Tirolin e Jugut, ku identifikohet vendndodhja e fundit e celularit, rreth 64 kilometra larg Roveretos. Nuk dihet se si Ferdinandi e kishte përshkuar atë distancë: kishte me vete vetëm një çantë të lehtë supi.

Babai dhe nëna ndërprenë pushimet në Shqipëri dhe shkuan në Rovereto

Babai dhe nëna ndërprenë pushimet në Shqipëri dhe shkuan në Rovereto. Më 1 shtator ndodheshin te karabinierët. Që nga ajo ditë, babai fillon të rrugëtojë vazhdimisht drejt e nga Trentino. Kërkonte Ferdinandin në rrugë, fliste me miqtë, të njohurit dhe karabinierët, por pa rezultat. Ndërkohë, më 5 shtator, në brigjet e Adiges, në Grumo, u gjend trupi i një të riu, të cilin askush nuk e lidhi me Ferdinandin.

Kërkimi i pareshtur i familjes

Familja vazhdoi ta kërkojë pa pushim. Në mes të shtatorit, babai iu drejtua avokatit Francesco Bonatesta, i cili më 18 shtator i shkruan Komisariatit të Qeverisë për Provincën e Trentos, duke kërkuar aktivizimin e planit provincial për kërkimin e personave të zhdukur.

Dhe në mbrëmjen e 24 shtatorit, në orën 23:10, ra telefoni i babait: karabinierët e Roveretos i kërkuan të paraqitej të nesërmen dhe e shoqërojnë në spitalin Santa Chiara të Trentos, ku ai identifikoi trupin e pajetë të të birit nga fytyra dhe gjithashtu nga një tatuazh në gjoks.