Çitaku: Nuk kam fije dyshimi se sonte do të jetë një festë për demokracinë

Nënkryetarja e PDK-së, Vlora Çitaku, në një konferencë për media ka ftuar edhe një herë qytetarët që të dalin e të votojnë.

Çitaku ftoi posaçërisht të rinjtë, të cilët ende nuk kanë votuar, të dalin e të votojnë.

“Prandaj edhe një herë ju ftoj të gjithëve, posaçërisht të rinjve e të rejave që nuk keni votuar ende, dilni e votoni. Dilni e votoni udhëheqësit më të mirë, të cilët do të jenë në krye të komunave në katër vjetët e ardhshëm”, tha ajo.

Çitaku thotë se nuk ka dyshim se sonte do të jetë festë për demokracinë.

Sipas saj, qytetari do të jetë fituesi më i madh.

“Siç e kam thënë edhe më herët sot, zgjedhjet lokale janë për qytetarët, jo për politikanët. Procesi i deritanishëm zgjedhor sipas informacioneve që kemi nga aktivistët tanë që janë të angazhuar në tërë territorin e Kosovës vlerësohen si pozitive dhe shumë inkurajuese. Nuk kam fije dyshimi se sonte do të jetë një festë për demokracinë dhe qytetari do të jetë fituesi më i madh”, ka thënë ajo. /Zëri