Muharremaj i AAK-së: Nuk do të heqim dorë nga posti i presidentit

Kryetari i Komunës së Suharekës, Bali Muharremaj, ka folur sa i përket zgjedhjes së presidentit të vendit. Anëtari i Kryesisë së AAK-së, Muharremaj, ka thënë se çfarëdo vendimesh që do t’i marrin Këshilli Drejtues dhe Grupi Parlamentar për këtë çështje do të pajtohen.

“Çështja e presidentit është çështje e Grupit Parlamentar dhe çështje e Këshillit Drejtues të partisë dhe qysh vendos Këshilli Drejtues ne pajtohemi”, tha ai.

Tutje, Muharremaj tha se nuk kanë hequr dorë nga presidenti.

“Ne nuk kemi hequr dorë nga Presidenca. Kemi të drejtë si çdo grup parlamentar që ka të drejtë të konkurrojë, edhe ne si Grup Parlamentar konkurrojmë për kryetar të shtetit. Unë besoj që përderisa nuk merren vesh partitë politike do të ta kenë të vështirë ta zgjedhin qeverinë dhe presidentin”, shtoi ai.

Sipas tij, fokusi kryesor i AAK-së është interesi i qytetarëve. Ai është i bindur se në zgjedhjet lokale do të jetë sërish kryetar i Suharekës.

“AAK-ja ka dëshirë ta çojë vendin përpara, sepse i shikojnë interesat e shtetit dhe çdo herë do të jenë për interesat e shumicës së qytetarëve. Unë besoj se do të jemi pjesë e Parlamentit të Kosovës dhe do të kemi 9 deputetë. Unë do të kandidoj dhe do të zgjidhem edhe një mandat kryetar i Komunës së Suharekës”, u shpreh Muharremaj.

AAK-ja në zgjedhjet e 14 shkurtit kishte garuar me kryetarin e saj si kandidat për president, por partia e Ramush Haradinajt në këto zgjedhje mori mbi 7 për qind të votave, duke u bazuar në rezultatet preliminare. /EO