Kurti rithekson mbështetjen e Kosovës për Ukrainën në përvjetorin e luftës
Kryeministri i Kosovës, Albin Kurti, ka ritheksuar mbështetjen e Kosovës për Ukrainën në përvjetorin e luftës, duke pritur në Kryeministri gra ukrainase të trajnuara për deminim dhe gazetarë që qëndrojnë në Kosovë në kuadër të programit JiR, ndërsa ka theksuar solidaritetin dhe empatinë e vazhdueshme ndaj popullit ukrainas.
Kryeministri i Kosovës, Albin Kurti, ka deklaruar se Kosova u ngrit nga hiri i luftës për t’u bërë një vend sovran, demokratik dhe i sigurt, sepse populli refuzoi të dorëzohej, duke theksuar se të njëjtën forcë e sheh sot në Ukrainë.
Në shënim të përvjetorit të luftës në Ukrainë, Kurti ka pritur në zyrën e Kryeministrisë gra nga Ukraina që morën pjesë në trajnimin e organizuar për deminim dhe pastrim të mjeteve shpërthyese. Pjesë e takimit ishin edhe gazetarë nga Ukraina që jetojnë dhe veprojnë në Kosovë në kuadër të programit JiR, të mbështetur nga Qeveria e Kosovës.
Ai theksoi se edhe pas katër viteve të përpjekjes së Rusisë për të pushtuar Ukrainën, Kosova qëndron pranë popullit ukrainas me empati dhe solidaritet.
"Qytetarët e Kosovës e njohin dhimbjen e dëbimit dhe humbjes, por gjithashtu e dimë se vendet mund të rindërtohen, të shërohen dhe të dalin më të forta. Besojmë se edhe Ukraina do ta bëjë të njëjtën gjë", ka shkruar Kurti në Facebook.
