Ura e Golikut në rrezik, gërmimet për ar po e çojnë drejt shkatërrimit

Ura e Golikut, Monument Kulture i Kategorisë së Parë, e ndërtuar në fund të shekullit XVII, po përballet sot me rrezikun e shkatërrimit.

Një nga veprat më të rëndësishme të trashëgimisë kulturore në zonën e Mokrës, e lidhur historikisht me degëzimin e rrugës antike Egnatia, po dëmtohet vazhdimisht nga gërmimet e paligjshme.

Prej vitesh, ura është pre e kërkuesve të arit dhe materialeve arkeologjike, të cilët ndërhyjnë në mënyrë të përsëritur në strukturën dhe trupin e saj, duke cenuar seriozisht qëndrueshmërinë e monumentit. Dëmtime të tilla janë konstatuar edhe së fundmi, por autorët mbeten të paidentifikuar, pasi gërmimet kryhen gjatë orëve të natës. Pasojat janë të dukshme: zgavra në themele, çarje në trupin e urës dhe shembje të pjesshme të materialit lidhës, dëmtime që përbëjnë rrezik serioz.

Kryeplaku i fshatit Golik, në një prononcim për RTSH-në, u shpreh se, “Kërkojmë nga institucionet shtetërore që të mirëmbajnë këtë urë. Në radhë të parë po shkatërrohet nga vetë dora e njerëzve, por edhe nga reshjet e shiut. Kemi parë gërmime që bëhen për thesare, por nuk kemi parë ndonjëri kush i bën, sepse kërkimet i bëjnë natën. Nëse nuk vënë dorë institucionet shtetërore, kjo urë do të rrëzohet.”

Përveç ndërhyrjeve kriminale, edhe faktorët atmosferikë kanë luajtur rolin e tyre. Mbi 300 vite ekspozim ndaj reshjeve, ngricave dhe erozionit kanë përshpejtuar degradimin e urës, duke e bërë sot emergjente domosdoshmërinë për ndërhyrje nga institucionet përgjegjëse./rtsh