Vuçiqi: Rendi botëror po përmbyset, Kosova po armatoset e po lidh aleanca ushtarake me Shqipërinë e Kroacinë
Presidenti serb Aleksandar Vuçiq theksoi sot se, pas veprimeve në Venezuelë, është e qartë se rendi ligjor ndërkombëtar dhe Karta e OKB-së nuk po funksionojnë fare, dhe shtoi se Serbia është veçanërisht e shqetësuar për armatosjen e Kosovës, e që sipas tij, është shkelje e Kartës së OKB-së dhe Rezolutës 1244 të Këshillit të Sigurimit të OKB-së.
Pas seancës së Këshillit të Sigurisë Kombëtare, Vuçiqi tha se Rezoluta 1244, megjithëse jo de jure, është pezulluar de facto nga fuqitë e mëdha perëndimore dhe disa aktorë rajonalë si Turqia.
“Ata po e armatosin me shpejtësi Prishtinën dhe një kërcënim i veçantë për integritetin dhe sovranitetin territorial është aleanca e Prishtinës, Tiranës dhe Zagrebit, e cila, siç e kemi parë, po zhvillohet në një fushë të gjerë dhe përfshin zhvillimin e përbashkët të sistemeve komplekse luftarake, nga automjetet 4x4 deri te idetë për armë më të fuqishme në të ardhmen”, shpjegoi ai.
Vuçiç theksoi se Serbia po e ndjek këtë nga afër.
"Po e ndjekim këtë me vëmendje dhe jo vetëm, por po përgatitemi për mbrojtje kundër atyre që nuk e kërcënojnë më vendin tonë, as fshehurazi, por hapur. Besojmë se forca jonë do të jetë një pengesë e mjaftueshme dhe se qëllimi i parë që i kemi vënë vetes, që është ruajtja e paqes dhe stabilitetit në Serbi, do të arrihet", nënvizoi ai.
Vuçiç raportoi se në seancën e sotme të Këshillit të Sigurisë Kombëtare u diskutuan tre tema.
“Njëra është siguria ushtarake dhe politike rajonale me fokus në situatën në Evropë dhe botë, e dyta është siguria dhe mbrojtja energjetike e Serbisë dhe e treta është veprimi amerikan në territorin e Venezuelës. Ne kemi nxjerrë përfundime të përshtatshme. Jemi të vetëdijshëm për kompleksitetin që ka vendi ynë në rajonin e Evropës Juglindore. E thashë qëllimisht në rajonin më të gjerë, jo vetëm në Ballkanin Perëndimor. Dhe sigurisht, ky kompleksitet i situatës sonë do të jetë më i theksuar duke pasur parasysh faktin se rendi i vjetër po shkatërrohet, se ligji më i lartë ndërkombëtar nuk ekziston dhe se rendi i OKB-së ekziston në letër”, tha ai./Zëri
