Mbrojta e Arben Ademit mohon akuzat, pas raportimeve për dyshime të financimit të grupeve radikale islamike

Media të shumta kanë raportuar gjatë ditëve të fundit rreth sipërmarrësit të njohur me origjinë shqiptare, Arben Ademi, i cili drejton markën e famshme të parfumeve “Gisada”.

Sipas një hulumtimi të publikuar nga portali zviceran 20 Minuten dhe më pas në shumë media shqiptare, autoritetet janë duke hetuar dyshimet nëse Ademi ka pasur lidhje financiare me individë ose rrjete të lidhura me islamizmin radikal.

Mbrojtja e Ademit, e përfaqësuar nga avokati Asdren Bytyqi, ka demantuar raportimet, duke i cilësuar si shpifje.

Në një komunikim me “Zërin”, avokati Bytyqi ka thënë se ndaj Ademit nuk ka procedurë penale, nuk ka akuza dhe as dënim.

Reagimi i plotë:

Po ju drejtohemi si përfaqësuesi i autorizuar avokat Asdren Bytyqi në emër të z. Arben Ademi, themelues i kompanisë Gisada, lidhur me artikullin e publikuar nga media juaj, i cili përmban pretendime për lidhje të supozuara të z. Ademi me aktivitete ekstremiste. Në përputhje me Ligjin për Media të Republikës së Kosovës, përfshirë të drejtën e përgjigjes dhe korrigjimit, me këtë parashtrojmë mbrojtjen formale të z. Ademi dhe kërkojmë publikimin e saj të menjëhershëm dhe të plotë, me të njëjtin nivel dukshmërie si artikulli origjinal, si dhe heqjen e përmbajtjes shpifëse që nuk mbështetet në asnjë konstatim gjyqësor.

Nuk ka procedurë penale, nuk ka akuza, nuk ka dënim

Vetë artikujt në gjuhën gjermane prej nga është marrë lajmi në fjalë konfirmojnë se:

Asnjë procedurë penale nuk është hapur ndonjëherë ndaj z. Arben Ademi;

Ademi nuk është marrë kurrë në pyetje, akuzuar apo ndjekur penalisht nga ndonjë autoritet në lidhje me ekstremizëm, terrorizëm apo financim të paligjshëm;
Nuk ekziston asnjë vendim apo aktgjykim gjyqësor, nga ndonjë gjykatë zvicerane apo ndërkombëtare, që të vërtetojë ndonjë veprim të kundërligjshëm nga ana e tij.

Paraqitja e pretendimeve të paverifikuara si fakte përbën shkelje të parimit themelor të prezumimit të pafajësisë dhe të standardeve të gazetarisë së përgjegjshme.

Mohim i qartë dhe i përsëritur nga z. Ademi

Ademi i ka mohuar kategorikisht të gjitha pretendimet, duke deklaruar qartë:

“Unë vetë nuk kam qenë kurrë aktiv në lëvizjen ‘Read!’ dhe nuk kam financuar asgjë për këtë organizatë. Unë jam sipërmarrës në fushën e modës dhe stilit të jetesës dhe nuk kam asnjë lidhje me ide ekstremiste”.

Ai ka theksuar gjithashtu:

“Nga ana ime nuk ka pasur asnjë dhurim parash për Kurane. Faktet e pretenduara janë plotësisht të pavërteta dhe, me shumë gjasë, për këtë arsye nuk janë bërë kurrë objekt i ndonjë procedure kundër meje”.

Këto deklarata janë të cituara edhe në vetë artikullin, por janë lënë në hije nga insinuata spekulative.

Pretendime të bazuara vetëm në shënime të paverifikuara informative

Artikulli mbështetet në:

raporte të brendshme policore, interpretime të paverifikuara të komunikimeve të personave të tretë, pretendime që burojnë nga procedura penale ndaj individëve të tjerë,

Pa arritur të vërtetojë:

Pjesëmarrje të drejtpërdrejtë,
Transaksione financiare të konfirmuara,
Apo përgjegjësi ligjore të atribuueshme ndaj z. Ademit.

Me rëndësi është fakti se artikulli pranon se hetimet e përmendura nuk kanë pasur të bëjnë me kompaninë Gisada dhe lidhen me veprimtari paralele të personave të tretë, jo me z. Ademi si i pandehur.

Prania në hapësira publike nuk përbën provë për pjesëmarrje

Artikulli i referohet faktit se z. Ademi gjoja është parë pranë një stende publike në vitin 2013. Z. Ademi ka sqaruar qartë se:

Ai nuk ka marrë pjesë në asnjë aktivitet shpërndarjeje;
Nuk ka qenë i përfshirë organizativisht apo financiarisht;
Çdo prani e tij ka qenë e shkurtër dhe pasive, në një hapësirë publike.

Një prani e tillë nuk përbën dhe nuk mund të konsiderohet pjesëmarrje, e aq më pak përfshirje penale.

Nuk ekziston asnjë provë për financim, transferta apo mbështetje

Artikulli nuk paraqet asnjë dokument bankar, asnjë transfertë të verifikuar gjyqësisht, asnjë pagesë të konfirmuar, që të dëshmojë se z. Ademi ka financuar aktivitete ekstremiste.

Pretendime të tilla si pagesa të supozuara, udhëtime apo mbështetje janë:

Të mohuara shprehimisht nga z. Ademi,
Të pambështetura nga vendime gjyqësore,
Kurrë të testuara në një proces gjyqësor kontradiktor.

Dëm serioz i reputacionit

Publikimi i pretendimeve spekulative pa konfirmim gjyqësor shkakton:

Dëm të rëndë reputacional,
Dëm profesional dhe komercial,
Stigmatizim publik pa bazë ligjore.

Kjo bie ndesh me detyrimet profesionale të medias për saktësi, balancë dhe proporcionalitet.

Kërkesat formale

Në bazë të sa më sipër, dhe në përputhje me legjislacionin në fuqi për media në Republikën e Kosovës, kërkojmë formalisht:

Publikimin e menjëhershëm dhe të plotë të kësaj mbrojtjeje, me të njëjtin nivel dukshmërie si artikulli origjinal;
Heqjen e artikullit/artikujve që përmbajnë pretendime shpifëse dhe të paverifikuara më së largu deri në ditën e sotit (23.12.2025);
Ndërprerjen e çdo publikimi apo ripublikimi të mëtejmë të të njëjtave pretendime, pa një konstatim gjyqësor përfundimtar.

Mosrespektimi i këtyre kërkesave mund të na detyrojë të ndjekim mjetet ligjore të parashikuara, me qëllim mbrojtjen e të drejtave, reputacionit dhe interesave biznesore të z. Ademi. Në pritje të konfirmimit tuaj për pranimin dhe publikimin pa vonesë.
Me respekt,

Prishtinë, Avokat Asdren Bytyqi, 23.12.2025