Protestuesit e “Trafikut Urban” dhe operatorët privatë bllokojnë edhe sot Komunën e Prishtinës
Transporti publik dhe ai privat në Prishtinë do të qëndrojë i bllokuar edhe këtë të hënë, pasi punëtorët e “Trafikut Urban” dhe operatorët privatë po vazhdojnë protestat, për shkak të mospagesave dhe bllokimit të buxhetit të Komunës.
Që nga 24 nëntori “Trafiku Urban” ka ndalur punën, në shenjë pakënaqësie ndaj mosshlyerjes së pagave të punëtorëve dhe borxheve ndaj furnitorëve, situatë që erdhi si pasojë e moszhbllokimit të buxhetit komunal nga Ministria e Financave.
Javën e kaluar punëtorët dhe kryetari i Prishtinës, Përparim Rama, marshuan drejt Qeverisë, për të kërkuar zhbllokimin e financave të kryeqytetit.
Ndërkohë, Asambleja Komunale votoi pro bartjes së 28 milionë eurove nga viti 2024 në vitin 2025.
Kryetari Rama i ka kërkuar ministrit në detyrë të Financave, Hekuran Murati, lirimin e të hyrave vetanake dhe granteve komunale, të cilat arrijnë në 35 milionë euro.
