Në Kosovë shënohet 25-vjetori i Rezolutës 1325 - gratë në qendër të sigurisë dhe paqes globale
Në kuadër të 25-vjetorit të miratimit të Rezolutës 1325 të Kombeve të Bashkuara për Gratë, Paqen dhe Sigurinë, Qendra Rajonale e Ekselencës për Gratë, Paqen dhe Sigurinë në Kosovë organizoi një konferencë njëditore kushtuar sfidave bashkëkohore që prekin gratë dhe vajzat në mbarë botën.
Në këtë ngjarje morën pjesë përfaqësues nga vendet e rajonit, ekspertë të sigurisë, aktivistë dhe përfaqësues të institucioneve, të cilët diskutuan kërcënimet e reja të shekullit XXI – nga dhuna me bazë gjinore e lehtësuar nga teknologjia, te siguria kibernetike dhe mbrojtja e të dhënave personale.
Qëllimi i diskutimeve ishte forcimi i bashkëpunimit rajonal dhe fuqizimi i rolit të grave dhe vajzave në vendimmarrje, në hapësirën digjitale dhe në jetën publike e politike.
Pjesa e fundit e konferencës u fokusua në rrëfimet personale të fëmijëve të luftës nga Kosova dhe Bosnja e Hercegovina – histori prekëse të njerëzve që kanë kaluar traumën ndërbrezore, por që e kanë kthyer dhimbjen në forcë, kurajë dhe sukses.
Ngjarja nënvizoi rëndësinë e ndërtimit të sistemeve të qëndrueshme mbështetëse për të mbijetuarit e luftës dhe për krijimin e shoqërive më gjithëpërfshirëse, demokratike dhe të zhvilluara.
