Gërvalla në OKB: Serbia është kërcënim real për rajonin

Ministrja e Punëve të Jashtme në detyrë, Donika Gërvalla, ka deklaruar sot në Këshillin e Sigurimit të OKB-së se shprehja “Kosovo Metohije” është një shprehje e ambicieve hegjemoniste të Serbisë ndaj Kosovës.

Gërvalla ka theksuar se Kosova është një demokraci e vërtetë perëndimore në Ballkan, me mbështetje të lartë ndaj NATO-s dhe Shteteve të Bashkuara.

“Më lejoni ta sqaroj se nuk ka ‘Kosovë Metohi’. Nuk ekziston, zonja dhe zotërinj. Kosova Metohi, si shprehje, është një shprehje e qartë e ambicieve hegjemoniste të Serbisë mbi Kosovën. Për ta thënë thjesht, është gjuha e vjetër e Slobodan Milosheviqit dhe atyre që ende e ndjekin. Kosova është një demokraci e pastër perëndimore në Ballkanin Perëndimor. Mbështetja për NATO-n dhe Shtetet e Bashkuara është në nivelin 90% në vendin tonë. Ne jemi vendi më pro-NATO dhe më pro-SHBA në botë. Ne u shpëtuam nga një gjenocid i vazhdueshëm nga bota e civilizuar përmes ndërhyrjes së NATO-s. Rreth 13,000 njerëz u vranë nga mizoritë serbe, të nxitura nga një kriminel krimesh lufte, Presidenti Milosheviq Dhe presidenti i tij gjatë këtij gjenocidi ishte Vuçiq, i cili tani është president i Serbisë. “, ka deklaruar ajo, transmeton Dukagjini.

Gërvalla ka deklaruar se Serbia përbën një kërcënim real për rajonin, duke theksuar propagandën sistematike që po përhapet në mediat e kontrolluara nga presidenti serb Aleksandër Vuçiq dhe përgatitjen e agresionit ushtarak ndaj Kosovës.

Ajo shfaqi edhe fotografi nga muralet dhe grafitet nëpër qytetet e Serbisë që deklarojnë qartë dëshirën për “rikthimin e ushtrisë serbe në Kosovë”, pa dhënë vetëm kohën e saktë, si një shenjë e qëllimeve të hapura të Beogradit.