Kupchan: Ndërhyrja amerikane në Kosovë ka ndihmuar në parandalimin e konfliktit të gjerë dhe ka siguruar stabilitetin rajonal

Administrata “Trump” ka ndryshuar ndjeshëm drejtimin e politikës amerikane, duke pasur ndikim si në nivel vendas, ashtu edhe në atë ndërkombëtar.

Profesori Charles A. Kupchan, ekspert i marrëdhënieve ndërkombëtare, vlerëson se disa premtime për riindustrializimin e Shteteve të Bashkuara janë pjesërisht të realizueshme, por kthimi i vendeve të punës si në vitet 1950 mbetet i pamundur për shkak të teknologjisë dhe automatizimit.

“Një pjesë e riindustrializimit është reale dhe tashmë po ndodh, por premisa për kthimin e punëtorëve amerikanë në linjat e prodhimit nuk do të materializohet. Shkaku kryesor i tkurrjes së klasës së mesme nuk është vetëm zhvendosja e industrisë, por edhe teknologjia”, tha Kupchani për Klix.ba.

Eksperti thekson se polarizimi i thellë në shoqërinë amerikane ka rritur rrezikun e dhunës politike, por nuk parashikon shpërthim të trazirave civile të përhapura.

Ai shton se për të rikthyer stabilitetin social, duhet investuar në arsimin dhe të ardhmen e punës për qytetarët amerikanë.

Në politikën ndërkombëtare, Kupchani vlerëson se ndërhyrja e SHBA-së në Ballkan gjatë viteve 1990, duke përfshirë Bosnjën dhe Kosovën, ka ndihmuar në parandalimin e konfliktit të gjerë dhe ka siguruar stabilitetin rajonal.

Megjithatë, ai kritikon embargojnë e armëve si një gabim historik dhe nënvizon nevojën për reformimin e Marrëveshjes së Dejtonit për Bosnjë dhe Hercegovinën, duke e bërë vendin më funksional dhe të integruar në strukturat evropiane.

Sipas Kupchanit, politika e Trumpit në Venezuelë dhe Amerikën Latine, përfshirë imigracionin dhe militarizimin kundër drogës, është e diskutueshme dhe ngre shqetësime për respektimin e ligjit ndërkombëtar, por reflekton gatishmërinë e administratës për të testuar kufijtë e pushtetit presidencial.

Kupchani përfundon se integrimi i plotë i vendeve të Ballkanit Perëndimor në Evropë mbetet synimi afatgjatë, edhe pse rruga drejt tij është e pasigurt dhe e ndikuar nga dinamika globale të fuqive të mëdha si SHBA-ja. /Telegrafi