Williams: Më kërkuan të përgatis gjuhë gjithëpërfshirëse për të siguruar që TPNJ-ja të kishte kompetenca për zbatimin e mandatit të saj

Dëshmitari Paul Williams kishte thënë se në mes qëllimeve që delegacioni kosovar kishte në Rambuje, ishte për t’u siguruar për të marrë angazhim konkret për Tribunalin Penal Ndërkombëtar për ish-Jugosllavinë.

Williamsi tha se ka punuar në mënyrë intensive me anëtarët e delegacionit gjatë bisedimeve në Rambuje, si dhe me anëtarë të diasporës kosovare gjatë përgatitjeve të këtyre bisedimeve.

“Sa i takon Rambujesë, më është kërkuar që të përpiloj-përgatisë gjuhën e cila të ishte sa më gjithëpërfshirëse për t’u siguruar që Tribunali Penal për ish-Jugosllavinë të ishte në gjendje që të kishte të gjitha kompetencat e veta për të zbatuar mandatin e tij”, tha dëshmitari.

Ai tha se e ftuan që të japë një prezantim në Rambuje për delegacionin kosovar dhe një ndër pikat ishte çështja e TPNJ-së.

“Gjatë ditës së parë ose të dytë kur isha në godinë aty me ftuan që të japë një prezantim delegacionit të Kosovës për katër pika: dhe pika e katër ishte juridiksioni, aktivitetet, hetimet e aktakuzat e TPNJ-së”, tha Williamsi.

Juristi i së drejtës ndërkombëtare po ashtu tha se delegacioni kosovar iu kërkoi hollësi lidhur me këtë çështje dhe për tema të tjera. Përshtatja e gjuhës në dokumente, sipas tij, iu kërkua nga Fehmi Agani.

Dëshmitari tha se ishte i thirrur që në këtë gjuhën gjithëpërfshirëse ta përfshinte qasjen e mjaftueshme të TPNJ-së për të ushtruar mandatin e saj edhe brenda Kosovës.

“Juridiksioni dhe aftësia e TPNJ-së që të vepronte në mënyrë efektive ishte e rëndësishme për disa arsye; konteksti konkret specifik përpara bisedimeve ishte Masakra e Reçakut dhe prokururorja përpiqej të kishte qasje në Kosovë se nuk kishte vizë. Asaj iu mohua viza. Më kujtohet se ka qenë masakra e Reçakut dhe ambasadori William Walker që përdori fjalën ‘krime kundër njerëzimit’. Prokurorja do të hetonte atje, por i thanë që nuk ke vizë”, u shpreh Williamsi.

Williamsi tha që arsyet e tjera që lidhen me mbështetjen e plotë të TPNJ-së, ishte edhe të ruhej një barazi morale.