Ish-ambasadori holandez: UÇK-ja ishte këmba e NATO-s në tokë

Ish-ambasadori holandez në Kosovë, Robert Bosch, ka thënë se UÇK-ja ishte këmba e NATO-s në tokë.

“Ta quash UÇK-në organizatë kriminale ky është ofendim edhe për NATO-n, sepse NATO-ja nuk bashkëpunon me organizata kriminale”, ka thënë ai.

Ai ka deklaruar se në kohën kur ishte në Kosovë kanë pasur presion për t’u bërë thirrje liderëve kosovarë që ta themelonin gjykatën speciale.

Ka shtuar se nuk i pëlqente kjo ide pasi serbët nuk ishin të akuzuar të kësaj gjykate.

“Më kujtohet mirë kur takova Thaçin dhe ai ishte pak i shqetësuar. Unë i thash se nëse do të jetë gjyq i drejtë ti do të jesh i lirë për shkak të mungesës së provave. Por unë nuk kisha të drejtë, sepse gjyqi nuk ishte aq serioz sa unë kisha pritur. Sepse siç e mbani mend raportin e Dick Martyt për trafikim të organeve, ai doli të ishte i rreme. Sepse vet gjyqtari kishte ardhur në përfundim se nuk kishte një gjë të tillë dhe ishte trillim i serbëve. Pra do të duhej të mbyllej gjykata sepse nuk kishte kuptim të vazhdonte më”, ka thënë ai.

Sipas tij, tashmë gjyqtarët kanë ardhur në përfundim se UÇK-ja ishte organizatë kriminale, duke shtuar se kjo është një marrëzi.