Izmaku Kusarit: S’e kishim prioritet nënkryetarin, jemi të hapur për marrëveshje politike

Deputetja e Nismës Socialdemokrate, Xhevahire Izmaku, ka deklaruar se partia e Fatmir Limajt ka qenë gjithmonë e përkushtuar për zgjidhjen e ngërçit politik.

Në një prononcim për Indeksonline, ajo ka komentuar edhe deklaratat e kryetares së Alternativës, Mimoza Kusari-Lila, e cila kishte thënë se Lëvizja Vetëvendosje i kishte ofruar Nismës postin e nënkryetarit të Kuvendit.

“Fatkeqësisht, nuk u arrit të krijohet një shumicë parlamentare, ndonëse ne kemi qenë të hapur për dialog dhe kompromis. Nisma nuk ka kërkuar dramë të re politike, duke e shtyrë vendin në zgjedhje të parakohshme, por ka insistuar në konstituimin e Kuvendit dhe të Qeverisë. Nëse do të kishte ekzistuar një shumicë prej 58 deputetësh nga Lëvizja Vetëvendosje, ne do të ishim ulur sërish në tavolinë – pa kushte dhe pa paragjykime. Por kjo nuk ka qenë e mundur deri tani”, është shprehur Izmaku.

Sa i përket deklaratës së Kusari-Lilës, deputetja e Nismës theksoi se s’kishte interesim për nënkryetarin, por për marrëveshje funksionale.