60% e gjuhës së urrejtjes në rrjete sociale vjen nga partitë politike, nënshkruhet Kodi i Sjelljes

Demokraci për Zhvillim (D4D) ka organizuar ceremoninë e nënshkrimit të Kodit të Sjelljes për rrjetet sociale dhe mediat online, në prag të zgjedhjeve lokale që do të mbahen më 12 tetor 2025.

Mark Baskin, këshilltar i lartë nga Qendra për Dialog Humanitar (HD), tha se ky angazhim pason një bashkëpunim të suksesshëm të vitit 2021 dhe synon të promovojë komunikim të përgjegjshëm, pa gjuhë urrejtjeje dhe pa dezinformim gjatë fushatave zgjedhore.

“Së pari, për ata që nuk e dinë, Qendra për Dialog Humanitar është një organizatë e pavarur që ka lindur nga një pjesë shumë e vogël e Komitetit Ndërkombëtar të Kryqit të Kuq mbi 25 vjet më parë. Ideja ishte të ndihmohej në zbutjen e konflikteve të dhunshme përmes ndërmjetësimit diskret, për të ndihmuar palët në konflikt të identifikojnë interesa të përbashkëta që të mund të përfundojnë konfliktet. Ne punojmë globalisht. Kemi mbi 350 kolegë në mbarë botën, nga Azia Juglindore deri në Afrikë, Lindjen e Mesme dhe Euroazi. Në Ballkan kemi punuar, me ndërprerje, për rreth 15 vjet. Kjo është Qendra për Dialog Humanitar, ose siç e quajmë shpesh, HD. Sa i përket sfondit të nënshkrimit të sotëm, filloi, në rastin tonë, gjatë COVID-it, kur nuk kishte shumë për të bërë. Pastaj zhvilluam një praktikë për mediat sociale dhe unë mësova për këtë gjë në mënyrë më sistematike. Në vitin 2021, HD punoi së bashku me D4D para zgjedhjeve lokale të atij viti. Partitë, mediat dhe organizatat e shoqërisë civile adoptuan një kod sjelljeje. Ishte një bashkëpunim shumë i suksesshëm në çdo aspekt. Dhe kështu vendosëm të bëjmë një vazhdim. Jo si një vazhdim i Hollivudit, ku filmat e mëvonshëm janë shumë më të dobët. Ne besojmë se ky vazhdim do të jetë shumë më i mirë se i pari”, theksoi ai.

Ai kujtoi se bashkëpunimi me D4D në Kosovë filloi në vitin 2021, në prag të zgjedhjeve lokale, kur për herë të parë u hartua dhe u nënshkrua një kod sjelljeje për rrjetet sociale.

“Pastaj, në rastin e HD-së, shkuam në Bosnje në vitin 2022, ku organizuam një asamble formale qytetare. Me një mostër të rastësishme të stratifikuar, mbi 50 pjesëmarrës nga e gjithë Bosnja – nga të dyja entitetet, nga të gjitha komunitetet, moshat 18 deri në 45 vjeç, përfaqësues nga të gjitha partitë politike – hartuan një kartë qytetare për përdorimin përgjegjës të mediave sociale gjatë fushatës zgjedhore të vitit 2022. Kjo tregoi një bashkëpunim të shkëlqyer ndër-etnik midis boshnjakëve, serbëve dhe kroatëve. Rezultoi që 32 parti politike e nënshkruan në Bosnje dhe, sipas standardeve tona, nuk pati shumë shkelje. Gjatë vitit të kaluar, kemi kontaktuar mediat, agjencitë rregullatore, partitë dhe shoqërinë civile. Kemi mbajtur disa tryeza për të shqyrtuar mënyrat se si mediat sociale të pakontrolluara – me dezinformim dhe gjuhë urrejtjeje – mund të helmojnë atmosferën politike dhe të vështirësojnë bashkëpunimin konstruktiv, që është karakteristikë e një sistemi normal demokratik. Dhe duhet të them, në të gjitha këto takime, të gjithë menduan se këto janë vlera të mira; se duhet të ketë një vetëdisiplinë të caktuar. Të gjithë ranë dakord se kjo ishte një ide e mirë, kushdo qoftë që e kontaktonim. Dhe pas reflektimit, kjo është në frymën e të gjithë aktorëve publikë gjatë 40–50 viteve të fundit këtu, të cilët kanë mbështetur një sistem normal dhe demokratik politik e shoqëror në Kosovë”, deklaroi Baskini.

Rezarta Delibashzade Krasniqi nga D4D theksoi se ky proces ka zgjatur katër muaj dhe është zhvilluar në konsultim me partitë politike, shoqërinë civile dhe mediat.

Ajo tha se 60% e gjuhës së urrejtjes në rrjetet sociale vjen nga vetë subjektet politike, duke e bërë këtë kod sjelljeje një hap të domosdoshëm drejt një procesi më demokratik dhe më të barabartë.

“Jemi mbledhur për të nënshkruar kodin e etikës për rrjetet sociale dhe mediat online, i cili do të zbatohet gjatë fushatës së zgjedhjeve lokale 2025 që do të mbahen më 12 tetor. Ky ka qenë një proces katërmujor, gjatë të cilit kemi marrë sugjerime nga partitë politike, shoqëria civile dhe mediat. Kemi hasur pak vështirësi për të adresuar të gjitha kërkesat tuaja, por për ne është shumë e vlefshme që kemi pasur dokumente dhe komente që lidhen drejtpërdrejt me zgjedhjet. Monitorimet e zgjedhjeve qendrore kanë treguar hapësira të mëdha për dezinformim, gjuhë urrejtjeje dhe stereotipe të ndryshme. Meqë 60 për qind e gjuhës së urrejtjes në rrjete sociale buron nga subjektet politike, nënshkrimi i kodit të sotëm është një angazhim i përbashkët për të pasur një mjedis më të shëndetshëm dhe një proces zgjedhor më demokratik e më të barabartë”, tha Delibashzade-Krasniqi.