Mbi 56 mijë aplikime për votim nga jashtë, KQZ-ja tregon pse i aprovoi vetëm 46 mijë
Komisioni Qendror i Zgjedhjeve (KQZ), njofton se nga data 23 korrik dhe deri në përfundim të afatit, më 29 gusht, përmes platformës elektronike të KQZ-së janë pranuar 56,778 aplikime për regjistrim për votim me postë, prej të cilave janë aprovuar 46,015, ndërkaq janë refuzuar 10,094 të tjera.
Zëdhënësi i KQZ-së, Valmir Elezi, theksoi se në shumicën e rasteve të refuzuara, aplikuesitë nuk kanë paraqitur njërin nga dokumentet që dëshmon adresën e tij jashtë Kosovës.
Sipas tij procesi i regjistrimit nuk ka qenë përjashtues, pasi çdo aplikues i refuzuar është njoftuar për arsyet e refuzimit dhe për mundësinë e ri-aplikimit duke paraqitur dokumentet e domosdoshme për regjistrim.
“Vetëm shtetasit e Kosovës që janë regjistruar gjatë periudhës 38-ditore, do të mund të votojnë përmes postës në periudhën e cila do të fillojë më 17 shtator dhe do të përmbyllet më 11 tetor 2025”, tha Elezi për RTK.
Elezi shton se në bazë të rregullores për regjistrimin dhe votimin jashtë Kosovës, KQZ do të sigurohet që, shtetasve të Kosovës që janë regjistruar për të votuar me postë nga jashtë vendit, t’ua dërgojë përmes postës pakon me nga dy fletëvotime.
Ndërkaq, është detyrë e secilit prej tyre që pakon me fletëvotime ta dërgojë në ndonjërën nga kutitë postare të KQZ-së që hapen në shtete të ndryshme të botës dhe në Kosovë.
Sipas Elezit, është detyrim ligjor për KQZ-në që shtetasit e Kosovës që janë regjistruar për të votuar nga jashtë Kosovës, t’i largojë nga Lista e Votuesve brenda Kosovës e cila shpërndahet në vendvotime, në ditën e zgjedhjeve.
“Pra, një shtetas që regjistrohet për të votuar jashtë Kosovës, do ta gjejë emrin e tij për votim vetëm në Listën e Votuesve jashtë Kosovës. Ndërkohë, shtetasit e Kosovës që jetojnë jashtë vendit dhe që nuk janë regjistruar për votim me postë, janë në Listën e Votuesve brenda Kosovës, e cila shpërndahet në vendvotime në ditën e zgjedhjeve”, ka thënë Elezi.
