Subvencionimi i teksteve shkollore vazhdon, prindërit të pakënaqur
Nesër fillon procesi mësimor në të gjitha institucionet publike dhe private të arsimit parauniversitar. Ndërkohë ka vazhduar procesi për subvencionimin e teksteve shkollore dhe materialeve mësimore përmes platformës e-Kosova. Për këtë proces ka pasur edhe pakënaqësi nga ana e prindërve. Ndërsa, Ministria e Arsimit ka bërë të ditur se procesi i aplikimit mbetet i hapur, me qëllim që të sigurohet përfshirja e të gjithë nxënësve.
Pothuajse në të gjitha shkollat e vendit të ciklit parauniversitar do të fillojë mësimi më 1 shtator, ndërsa procesi për furnizimin e nxënësve me tekste shkollore është duke vazhduar.
Edhe këtë vit, prindërit janë subvencionuar për blerjen e teksteve shkollore për nxënësit nga klasa e parë deri në të nëntën. Disa prej tyre e kanë vlerësuar këtë proces të pasuksesshëm, e disa prej tyre urojnë një fillim të mbarë të këtij viti shkollor.
“Shumë tollovi po bëhet nëpër librari, nuk e di pse e kanë ndërruar mënyrën e pajisjes me tekste shkollore...”, tha njëri nga prindërit.
"Tani neve po na duhet me i mbajt, dhe nuk po mundemi me i pas të kompletuara”, shtoi një tjetër.
“Po na ndodhë që nuk po i gjejmë të gjitha në një vend, e po duhet me i kërku në disa librari derisa po i kompletojmë... Kisha uruar të gjithë ata fëmijë që fillojnë ditën e parë në shkollë që të jetë një vit i mbarë , me plotë shëndet e plot suksese”, theksoi një tjetër prind.
Edhe Sindikata e Arsimit ka uruar një fillim të mbarë të vitit shkollor.
Nënkryetarja e kësaj Sindikate, Vjollca Shala, ka thënë për Radio Kosovën, se shpreson që sapo të formohen institucionet qeveritare të fillojë dialogu social, pasi sipas saj, gjendja aktuale e mësimdhënësve nuk është e mirë.
“ Me këtë gjendje që e kemi aktualisht, dhe në vazhdimësi për të pasur cilësi në arsim, duhet të angazhohen të gjithë akterët dhe të arrihet një e gjë e tillë. Ne kemi në proces mësimor edhe mësimdhënës të cilët janë me gjendje të rëndë shëndetësore”, tha Shala.
Radio Kosova i ka drejtuar pyetje Ministrisë së Arsimit, për fillimin e vitit shkollor dhe procesin e subvencionimit të prindërve për tekstet dhe materialet shkollore, por ende nuk ka kthyer përgjigje.
Megjithatë, Ministria e Arsimit ka bërë të ditur se deri më 27 gusht, përmes platformës e-Kosova, janë pranuar gjithsej 183 mijë e 226 aplikime për furnizim me tekste shkollore dhe materiale mësimore, ndërsa kanë filluar edhe pagesat e para.
Sipas Ministrisë, të gjitha aplikimet janë verifikuar nga koordinatorët e shkollave dhe Drejtoritë Komunale të Arsimit.
Procesi i aplikimit mbetet i hapur, me qëllim që të sigurohet përfshirja e të gjithë nxënësve, thuhet në njoftimin e Ministrisë së Arsimit, ndërsa për prindërit që kanë pasur probleme dhe ankesa kanë mundur të kontaktojnë në adresat përkatëse të publikuara nga ana e Ministrisë.
