Sadiku: Dialogu me Serbinë ka ngecur, pasojat më të mëdha i bart Kosova
Analisti politik, Arbnor Sadiku, vlerësoi se dialogu ndërmjet Kosovës dhe Serbisë ka ngecur për shkak të krizave të brendshme dhe mungesës së legjitimitetit të institucioneve si dhe për shkak të mungesës së vullnetit të komunitetit ndërkombëtar për të ndërmjetësuar një marrëveshje të qëndrueshme.
Sadiku tha se pasojat më të mëdha i ndien Kosova, e cila mbetet e bllokuar në proceset ndërkombëtare dhe në zhvillimet ekonomike dhe politike.
“Dialogu mes Kosovës dhe Serbisë ka vendnumëruar për dy arsye: e para gjendja e jashtëzakonshme dhe protestat në Serbi e kanë pamundësuar që të kemi dialog dypalësh të suksesshëm dhe në të njëjtën kohë mungesa e legjitimitetit të institucioneve të Kosovës e ka pamundësuar që përparimi të jetë dhe të shkohet në tavolinën e bisedimeve.
Po ashtu edhe mungesa e aktorëve ndërkombëtarë që janë SHBA-ja dhe Unioni Evropian, meqenëse ata kanë qenë shumë të zënë, sidomos gjatë javëve të fundit dhe muajve të fundit me zgjidhjen e luftës në Ukrainë. Natyrisht, edhe problemet e tjera që kanë ndodhur në Izrael dhe Gaza kanë bërë që mos të kemi një vullnet politik të bashkësisë ndërkombëtare dhe në të njëjtën kohë pengesa që i kanë shkaktuar Kosova dhe Serbia që të kemi një dialog praktik, i cili mund të vazhdojë tutje dhe të kemi zgjidhjen e problemeve të natyrës politike që janë mes Kosovës dhe Serbisë”, tha Sadiku.
Ai mendon se se pa një angazhim të fortë ndërkombëtar, procesi i normalizimit mund të zgjasë shumë, ndërsa një ndërhyrje diplomatike e SHBA-së mund të ofrojë një shans për përshpejtim të dialogut.
“Nëse e shikojmë vendosjen e paqes që po ndodh në Ukrainë, nëse kjo ndodh edhe me Kosovën, sigurisht që mund të ndodh shumë shpejt pasi që pas zgjidhjes së problemeve ose mosmarrëveshjeve midis Ukrainës dhe Rusisë, pastaj edhe Izraeli sigurisht që presidenti Trump do të shikojë edhe një fitore të re në diplomaci dhe natyrisht kjo mund të jetë Kosova. Ai ndoshta mund t’i japë një kahe më të shpejt zhvillimeve të zgjidhjes së problemit mes Kosovës dhe Serbisë. E kundërta nëse nuk ka një vullnet të tillë për këtë nga SHBA-ja dyshoj shumë se Unioni Evropian mund të vijë deri te një zgjidhje shpejt të këtij problemi, por do të kemi një ngërç të vazhdueshëm dhe zgjatje të zgjidhjes së mosmarrëveshjeve politike mes Kosovës dhe Serbisë”, tha ai.
Sipas Sadikut, ngecja e dialogut penalizon më së shumti Kosovën, duke e bërë të pamundur anëtarësimin në organizata ndërkombëtare dhe duke vonuar reformat ekonomike dhe legjislative.
“Nga moszgjidhja e problemit mes Kosovës dhe Serbisë më së shumti humbet Kosova për shkak se Kosova nuk mund të anëtarësohet në organizata ndërkombëtare, përveç problemeve të saj ekonomike dhe politike, Kjo i merr një kohë bukur të gjatë edhe politike, edhe ekonomike që në një formë ose në një tjetër do të duhej të shpenzojë kohë shtesë në dialog në vend që të merret me problemet e saj të brendshme, siç janë shtimi i njohjeve të reja, ndërmarrja e hapave për të zbutur krizën ekonomike dhe natyrisht ecja e reformave legjislative dhe formave të tjera që janë të domosdoshme për një qeveri që të vazhdojë punën e saj në të ardhmen”, tha për Ekonomia Online , Sadiku.
Gjatë javëve të fundit, i dërguari i Bashkimit Evropian për dialogun, Peter Sørensen, ka zhvilluar takime në Beograd dhe Prishtinë për të përgatitur rundet e ardhshme të dialogut Kosovë-Serbi, por ngecja mbetet evidente për shkak të krizave politike dhe sociale që po përballen të dyja vendet.
