Bajram Gecaj për kryetarin e Junikut: I dha jetë një komune që për vite të tëra kishte mbetur nën hije

Lidhja Demokratike e Kosovës, do të kërkojë edhe një mandat në Junik me kryetarin aktual Ruzhdi Shehu, në zgjedhjet e 12 tetorit.

Në mbështetje të Shehut ka dalë edhe anëtari i kryesisë së LDK-së, Bajram Gecaj i cili tha se Shehu i ka dhën frymë të re Junikut në katër vitet e qeverisjes komunale, transmeton Zeri.info.

“Sot, me bindje të plotë e me krenari, them se ai nuk doli vetëm një kryetar i mirë, por një vizionar që i dha jetë një komune që për vite të tëra kishte mbetur nën hije”, ka shkruar Gecaj për Shehun.

Sipas tij, përtej shifrave e projekteve, ajo që e bën Ruzhdiun të veçantë është stili i tij i qeverisjes: pa skandale, me integritet të plotë, transparencë dhe me respekt për qytetarin.

Gecaj është shprehur se Juniku këtë herë nuk ka nevojë për balotazh.

Shkrimi i plotë i Gecajt:

Ruzhdi Shehu për KRYETAR të Junikut …

… një Histori Suksesi dhe Besueshmërie …

Katër vite më parë, unë dhe shumë të tjerë që e njohim Ruzhdi Shehun prej kohësh, besuam fort se ai do t’i sillte një frymë të re Junikut. Sot, me bindje të plotë e me krenari, them se ai nuk doli vetëm një kryetar i mirë, por një vizionar që i dha jetë një komune që për vite të tëra kishte mbetur nën hije.

Aktivitet e Ruzhdiut i kam njohur qysh në vitet e para të angazhimeve rugoviste, kur për ne politika nuk ishte thjesht pushtet, por mision dhe përgjegjësi kombëtare. Aty ku e njohim njëri-tjetrin prej dekadash, ai ka qenë gjithmonë i njëjti: njeri i drejtë, i ndershëm dhe me një përkushtim të jashtëzakonshëm për vendin dhe për njerëzit e vet.

Në këto katër vite, ai e ktheu Junikun nga një qytezë me mundësi të hapura, në një komunë moderne, me infrastrukturë, zhvillim dhe perspektivë. Me një buxhet modest prej vetëm gjysmë milioni eurosh në vit për investime kapitale, Ruzhdi Shehu arriti të sjellë projekte mbi 10 milionë euro, falë bashkëpunimit me partnerë vendorë e ndërkombëtarë. Për më tepër, siguroi edhe një investim madhor: një park solar prej 42 milionë eurosh – një hap i madh strategjik për zhvillimin e qëndrueshëm të Junikut, por jo vetëm.

Por, përtej shifrave e projekteve, ajo që e bën Ruzhdiun të veçantë është stili i tij i qeverisjes: pa skandale, me integritet të plotë, transparencë dhe me respekt për qytetarin. Për këtë arsye, edhe kundërshtarët e tij politikë e kanë të vështirë të mohojnë punën që ai ka bërë.

Ai ka qenë gjithmonë aty, në çdo sektor të jetës së Junikut – me njerëzit dhe për njerëzit. Dhe mbi të gjitha, ka ruajtur ndershmërinë e pakompromis, karakterin e fortë dhe lidhjen e ngushtë me qytetarët e tij.

Si ekonomist i diplomuar në fushën e ndërmarrësisë, Ruzhdi Shehu është një ndërmarrës vërtetë vizionar, nga i cili Juniku do të përfitojë edhe më shumë në vitet që vijnë. Me përvojën e gjatë në institucionet e Republikës së Kosovës – si në nivelin qendror ashtu edhe në atë lokal – ai jo vetëm që e njeh nga afër mënyrën se si funksionojnë ato, por mbi të gjitha e ndien qartë se çfarë duhet ndryshuar për t’i çuar përpara proceset dhe për t’i dhënë qytetarëve rezultate konkrete.

Një tjetër dëshmi e sinqeritetit të tij është zotimi publik se mandati i dytë do të jetë i fundit për të si kryetar. Për Ruzhdiun pushteti nuk është qëllim në vetvete, por një mjet për t’i shërbyer vendit dhe qytetarëve. Kjo është një qasje që e dallon nga të tjerët.

Së fundi, nuk mund të lë pa përmendur edhe thirrjen që ai i bëri mërgatës për regjistrim në zgjedhje. Sot, falë këtij angazhimi, rreth 1,300 junikas të diasporës janë regjistruar për të votuar më 12 tetor. Kjo është dëshmi e rolit që mërgata ka pasur dhe do të ketë në qeverisjen e tij.

Unë nuk kam asnjë dyshim: Juniku këtë herë nuk ka nevojë për balotazh. Kryetari i ardhshëm do të jetë i njëjti që e ringriti dhe e bëri me shpresë – Ruzhdi Shehu. Vota për Ruzhdën është votë edhe për mua!

VOTO: Lidhja Demokratike e Kosovës

VOTO: #RuzhdiShehu Kryetar

Qofshi faqebardhë dhe na priftë e mbara!