IKSHPK-ja jep rekomandime për përdoruesit e pishinave publike

Instituti Kombëtar i Shëndetësisë Publike të Kosovës (IKSHPK) ka ndarë disa këshilla për përdoruesit e pishinave publike.

Në kuadër të mbrojtjes së shëndetit publik dhe garantimit të sigurisë në ambientet ujore, IKSHPK-ja u bëri thirrje të gjithë qytetarëve që përdorin pishinat publike, të respektojnë udhëzimet në vijim:

Ruani higjienën personale

- Para hyrjes në pishinë, bëni gjithmonë dush me ujë të rrjedhshëm;

- Përdorni rroba banje të pastra dhe mos hyni në ujë me rroba të zakonshme;

- Ndalohet hyrja në pishinë nëse vuani nga sëmundje infektive, të lëkurës apo të traktit tretës (p.sh. diarreja);

- Nëse keni plagë të hapura, mos hyni në ujë – ato janë portë për infeksione.

Sjellje e përgjegjshme në pishinë

- Respektoni rregullat dhe shenjat sinjalizuese;

- Mbani fëmijët nën mbikëqyrje të vazhdueshme;

- Shmangni sjelljet e rrezikshme si vrapimi, zhytjet e papritura apo hedhjet pa kontroll;

Ndalohet ndotja e ujit

- Mos urinoni në ujë– dobëson efektin e klorit dhe përhap infeksione;

- Mos fusni ushqim ose pije në zonën e ujit– kjo rrit rrezikun për ndotje dhe tërheq insekte;

- Fëmijët e vegjël të përdorin pelena të posaçme për ujë;

Zgjidhni ambiente të sigurta dhe të mirëmbajtura

- Frekuentoni vetëm pishinat që plotësojnë kushtet sanitare dhe janë të licencuara;

- Nëse vëreni ujë të turbullt, erë të rëndë apo mungesë pastërtie, mos hyni në ujë dhe raportoni menjëherë.

IKSHPK-ja thotë tutje se kujdesi për higjienën dhe respektimi i rregullave ndihmon në mbrojtjen e shëndetit tuaj dhe të të tjerëve.