Izmaku: Këtë fundjavë takimi Kurti - Limaj, presim epilog pozitiv

Deputetja e Nismës Socialdemokrate, Xhevahire Izmaku, ka bërë të ditur se në fundjavë do të zhvillohet një takim mes kreut të këtij subjekti politik, Fatmir Limaj dhe atij të Lëvizjes Vetëvendosje, njëherësh kryeministër në detyrë, Albin Kurti.

Izmaku ka thënë se takimi do të realizohet me ftesë të Limajt, ndërsa është shprehur optimiste për një epilog pozitiv.

“Besoj se do të jetë në fundjavë, nuk jam e sigurtë nëse saktë do të jetë të shtunën apo të dielën, mirëpo sigurisht që deri në fundjavë do të kemi një takim të kryeministrit në detyrë edhe të liderit tonë Limajt. Këtë herë me kërkesën e Limajt dhe besoj që do të kemi një epilog pozitiv”, ka thënë Izmaku në Tëvë1.

E pyetur nëse ka ndryshim të qëndrimeve të Vetëvendosjes apo të Nismës, ajo ka mohuar një gjë të tillë duke theksuar se nuk ka pasur as tërheqje e as lëshime, por përpjekje për një zgjidhje.

“Dua ta shoh më shumë një fortësim të përpjekjeve për të pasur diçka pozitive, ndërsa nuk kisha thënë asnjë tërheqje apo asnjë lëshim pe, përndryshe ne jemi ende në pistën e fillimit të bisedimeve ..”, është shprehur ajo.