Vdekja e Agon Zejnullahut, ende mungon raporti i autopsisë

Ka përfunduar autopsia e 27-vjeçarit që vdiq gjersa po arrestohej nga pesë zyrtarë policor në Lipjan por jo edhe raporti mbi të. Nga IML bëjnë të ditur se janë në pritje të urdhëresave nga ana e Prokurorisë për dërgimin e disa mostrave jashtë vendit ndërsa njohës të këtyre çështjeve, bëjnë të ditur se kjo do të marrë kohë, marrë parasysh se të njëjtat nuk mund të përfundohen në Kosovë.

Pamjet që treguan pesë zyrtarë policor mbi trupin e tani të ndjerit, Agon Zejnullahu në përpjekje për ta arrestuar të njëjtin tronditën opinionin për nga dilemat se si vdiq 27-vjeçari.Nga pakujdesia e zyrtarëve policor apo jo, dritë mbi rastin pritet të hedhë raporti i Institutit të Mjekësisë Ligjore i cili ende, nuk ka përfunduar.

Ndonëse, autopsia ka përfunduar, por nuk dihet se sa kohë do marrë edhe përfundimi i raportit.

“Ashtu siç jeni njoftuar më parë, autopsia e të ndjerit është kryer me urdhëresë nga Prokuroria. Aktualisht, mostrat e marra gjatë autopsisë nuk janë dërguar jashtë vendit. Për çdo veprim të tillë, përfshirë dërgimin e mostrave për analizë jashtë shtetit, nevojitet urdhëresë shtesë nga Prokuroria, dhe në këtë drejtim jemi në kontakt të vazhdueshëm me organet kompetente për të përcaktuar hapat e mëtejmë. Është përfunduar vetëm autopsia, nuk është përfunduar raporti”, tha Agron Thaçi, drejtor i Departamentit të Laboratorëve në Institutin e Mjekësisë Ligjore.

E sipas njohësve të ligjit, IML e ka të pashmangshme dërgimin e analizave jashtë vendit, proces i cili, nuk pritet të përfundojë në ndonjë kohë të shkurtër.

Ekspertiza mjeko-ligjore si dhe raporti i analizave toksikologjike janë njëri prej faktorëve vendimtarë në rastin   shkakut të vdekjes dhe prezencës së substancave alkoolike dhe të tjera në gjakun e të ndjerit. Këto marrin kohë deri në përfundimin e tyre sepse IML, përkatësisht laboratori në kuadër të këtij instituti nuk është funksional dhe të njëjtat duhet të dërgohen për analiza jashtë vendit”, deklaroi Ardian Bajraktari, avokat.

Që të njëjtat të dërgohen jashtë vendit, urdhri duhet të vijë nga Prokuroria Themelore në Prishtinë.

Por, e njëjta, nuk është përgjigjur në interesimin e Dukagjinit lidhur me çështjen.

Pesë zyrtarëve policor, Gjykata u ka caktuar nga një muaj paraburgim pasi u arrestuan nën dyshimin për vrasje nga pakujdesia të 27-vjeçarit Agon Zejnullahu në Lipjan.

Në deklarata publike, familja e të njëjtit kanë thënë se besojnë se zyrtarët policorë në Lipjan përdorën dhunë të tepruar ndaj tij, çka ia shkaktoi edhe vdekjen./RTV Dukagjini