LVV: Ankesën për votat me postë e bëmë brenda afatit, PZAP-i po i ikën rivotimit
Lëvizja Vetëvendosje e ka cilësuar arbitrar dhe të pashpjegueshëm refuzimin e ankesës nga Paneli Zgjedhor për Ankesa dhe Parashtresa (PZAP) për përsëritje të votimit me postë, duke thënë se ankesa është bërë brenda afatit kohor.
LVV-ja ka reaguar ashpër ndaj Panelit Zgjedhor për Ankesa dhe Parashtresa (PZAP), duke e akuzuar për shmangie nga vendimi për rivotimin e votave me postë.
Sipas Vetëvendosjes, administrimi i votave në Qendrën e Numërimit dhe Rezultateve ka treguar për manipulime të organizuara nga Lidhja Demokratike e Kosovës (LDK).
Në këtë kontekst, partia ka dorëzuar një ankesë për anulimin e këtyre votave dhe kërkesën për rivotim përmes postës.
“Vëzhguesit tanë kanë mbledhur fakte dhe prova për shkelje të shumta, të cilat tregojnë ndërhyrje të organizuar në votimin përmes postës nga LDK. KQZ njoftoi se numërimi përfundoi më 5 mars 2025, në ora 21:00, dhe afati për ankesa ishte 48 orë nga ai moment. Ne e dorëzuam ankesën më 7 mars, në ora 20:20, brenda afatit ligjor”, thuhet në reagimin e Vetëvendosjes.
Sipas kësaj partie, vendimi i PZAP-së për të shpallur ankesën e tyre të pasafatshme është i pashpjegueshëm dhe bie ndesh me ligjin.
“Justifikimi i PZAP-së është një përpjekje e qartë për t’i ikur përgjegjësisë institucionale dhe ligjore. Shkeljet dhe manipulimi flagrant i votimit përmes postës nuk mund të anashkalohen. Integriteti i zgjedhjeve duhet të garantohet me anulimin e votave dhe rivotimin përmes postës”, përfundon reagimi i Vetëvendosjes.
Partia ka njoftuar se do të ushtrojë një ankesë të re pas shpalljes së rezultateve përfundimtare.
