Ushtarët finlandezë të KFOR-it kryen patrullime në veri, analizuan kushtet aktuale të rrugëve dhe urave
Ushtarët finlandezë të misionit të KFOR-it në Kosovë kanë kryer patrullime rutinore në veri të vendit.
Kjo është bërë e ditur nga KFOR-i.
“Ushtarët inxhinierë finlandezë, të caktuar në Komandën Rajonale në Lindje të misionit KFOR të udhëhequr nga NATO-ja, kryen një patrullë rutinë në veri të Kosovës për të analizuar kushtet aktuale të rrugëve dhe urave”, thuhet në njoftim.
Gjithashtu u tha se këto përpjekje janë pjesë e misionit të përditshëm të KFOR-it për të garantuar një mjedis të sigurt për të gjitha komunitetet që jetojnë në Kosovë.
“KFOR-i vazhdon të zbatojë mandatin e tij – duke u bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të qetë dhe të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë”, thuhet në njoftimin e KFOR-it.
