Haxhiu: Qeveria ka mbështetur ekipet mbrojtëse në Hagë me 30 milionë euro

Ministrja e Drejtësisë Albulena Haxhiu, duke folur për ankesat që kanë pasur të arrestuarit nga Gjykata Speciale në Hagë, ka thënë se ekipet mbrojtëse janë mbështetur deri tani me 30 milionë euro.

“Sa i përket Gjykatës Speciale, ne e kemi kundërshtuar në Kuvend, e kemi dërguar në Gjykatë Kushtetuese dhe nuk kemi arritur që ta ndalim. Të gjitha deklaratat që sot bëhen mund t’i gjeni në transkriptet e seancës. Akuzat duhet të drejtohen në drejtim të atyre që e kanë votuar, ata po thonë që janë mashtruar”, tha ajo.

Haxhiu tha se deri tani ekipet mbrojtëse janë mbështetur deri në 30 milionë euro.

“Nuk mjafton vetëm të thuhet që jemi mashtruar, le të kërkojnë falje për gabimin e madh që e kanë bërë më atë kohë. Deri tani ne kemi mbështetur ekipet mbrojtëse deri në 30 milionë euro. Do të vazhdojmë mbështetjen”, tha ajo.

Ajo ka theksuar se është e rëndësishme të adresohen ankesat kushdo që i shkel.

“Është thënë që takimi është lënë në gjysmë, ju e dini që kam vizituar edhe Gucatin, Haradinajn, Selimin, e të tjerët, njëri nga ta ka deklaruar se e kam lëshuar takimin dhe kjo nuk qëndron”, tha Haxhiu.