Barduani takohet me ambasadoren holandeze, flasin për stabilitetin rajonal

Komandanti i Misionit të KFOR-it, Enrico Barduani, është takuar me ambasadoren e Mbretërisë së Holandës, Karin Boven, me të cilën ka biseduar rreth situatës dhe stabilitetit rajonal.

KFOR-i, përmes një postimi në rrjetin social Facebook, ka bërë të ditur se Barduani ka shprehur mirënjohje ndaj Bovenit për kontributet afatgjate të Holandës në sigurinë e rajonit, raporton Zeri.info.

“Ata diskutuan mbi pikëpamjet lidhur me tema të ndryshme, duke përfshirë sigurinë e qëndrueshme në të gjithë Kosovën, situatën e stabilitetit rajonal dhe përpjekjet e KFOR-it në mbështetje të dialogut të lehtësuar nga BE ndërmjet Prishtinës dhe Beogradit”. Gjeneral Major Barduani gjithashtu i shprehu ambasadores Boven urimet për kontributet afatgjata të Holandës ndaj KFOR-it dhe stabilitetit rajonal”, thuhet në njoftim.

Bëhet e ditur se ky takim është pjesë e ndërveprimeve të rregullta të gjeneralmajor Bardunit me homologët e tij përkatës në Kosovë dhe në rajon.

KFOR-i vazhdon të zbatojë mandatin e tij – të bazuar në Rezolutën e Këshillit të Sigurimit të Kombeve të Bashkuara të vitit 1999 – për të kontribuuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë dhe për lirinë e lëvizjes, në çdo kohë dhe në mënyrë të paanshme.

KFOR-i punon në bashkëpunim me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX).