Një zyrtar i lartë amerikan, këtë javë viziton Kosovën, Shqipërinë dhe Serbinë
Zëvendës Sekretari i Shtetit për Menaxhimin dhe Resurset, Richard R. Verma, do të udhëtojë në Kosovë, Shqipëri dhe Serbi nga 7-11 janar.
Siç njoftoi Departamenti i Shtetit, në Kosovë, Verma do të diskutojë “për normalizimin e marrëdhënieve me Serbinë përmes Dialogut të lehtësuar nga BE-ja, forcimin e qeverisjes dhe sundimit të ligjit, si dhe nxitjen e rritjes ekonomike dhe sigurisë energjetike për të mirën e të gjithë kosovarëve”.
“Ai gjithashtu do të falënderojë Qeverinë e Kosovës për mbështetjen e fuqishme të Ukrainës dhe për ndihmën e saj për afganët në nevojë”, u tha në njoftim, raporton Klankosova.tv.
Në Tiranë, sipas njoftimit, ai do të diskutojë përparimin demokratik të Shqipërisë, aftësitë mbrojtëse dhe thellimin e lidhjeve ekonomike me Shtetet e Bashkuara dhe do të falënderojë Qeverinë e Shqipërisë për mbështetjen e vazhdueshme ndaj aleatëve tanë afganë.
Edhe në Serbi, Zëvendës Sekretari i Shtetit amerikan për Menaxhimin dhe Resurset thuhet se do të ofrojë mbështetje për normalizimin e marrëdhënieve të këtij vendi me Kosovën.
“Ai gjithashtu do të riafirmojë përkushtimin e Shteteve të Bashkuara ndaj vendeve të Ballkanit Perëndimor, ndërsa ato ndjekin integrimin euroatlantik dhe bashkëpunimin më të thellë rajonal”, u tha në njoftimin e DASh-it.
