22 vjet nga vrasja e Tahir Zemajt, Osmani: Vrasësit ende s’janë ndëshkuar

Presidentja Vjosa Osmani ka kujtuar kolonelin Tahir Zemaj, në 22-vjetorin e vrasjes.

Në një postim të Presidencës së Kosovës në Facebook, thuhet se në 22-vjetorin e vrasjes, e kujtojnë me respekt heroin e Kosovës, kolonelin Tahir Zemaj, ushtarakun e UÇK-së dhe njërin nga figurat më të shquara të luftës për liri.

“22 vjet më parë, ai u vra pabesisht në hyrje të Pejës, së bashku me të birin Enisin dhe kushëririn Hasanin.  Vrasësit, të cilët lanë pas tragjedinë dhe dhimbjen, ende nuk janë ndëshkuar. Kjo është një dhimbje që nuk mund të fshihet, një plagë që është ende e hapur”.

“Vepra e kolonel Tahir Zemajt, si një udhëheqës i paepur dhe guximtar, vazhdon të frymëzojë brez pas brezi. Emri i kolonelit do të jetë gjithmonë  simbol i sakrificës dhe i luftës për liri dhe pavarësi, ndaj zbulimi i autorëve të vrasjes dhe vënia para drejtësisë janë të domosdoshme”, thuhet në njoftimin e presidencës.