KQZ-ja thotë se 28 subjekte politike aplikuan për t’u certifikuar për zgjedhje
Komisioni Qendror i Zgjedhjeve në Kosovë (KQZ) ka bërë të ditur se 28 subjekte politike kanë aplikuar për certifikim për pjesëmarrje në zgjedhjet parlamentare të 9 shkurtit.
Sipas një njoftimi për media, pas mbylljes së afatit zyrtar, në mesin e 28 subjekteve politike janë 20 parti politike, pesë koalicione, dy iniciativa qytetare dhe një kandidat i pavarur.
Në mesin e subjekteve janë parti shqiptare, të komunitetit serb dhe komuniteteve të tjera më të vogla në Kosovë.
Lista e publikuar nga KQZ-ja:
Parti politike: Lëvizja Vetëvendosje, Partia Demokratike e Kosovës, Lidhja Demokratike e Kosovës, ListaSerbe, Srpski Narodni Pokret, Fjala, Partia Liberale Egjiptiane, Nova Demokratska Stranka, Iniciativa e Re Demokratike e Kosovës, Socialdemokratska Unija, Kosova Demokratëk Türk Partisi, Yenilikçi Türk Hareket Partisi, Jednstvena Goranka Partija (JGP), Partia e Ashkalinjve për Integrim (PAI), Srpska Demokratija, Partija Kosovskih Srba, Za Slobodu Pravdu i Postanak, Partia Balli Kombëtar Demokrat Shqiptar, Partia Rome e Bashkuar e Kosovës, Kosova Adalet Türk Partisi.
Koalicione: Naša Bošnjacka Koalicija (Naša Inicijativa i Bošnjaëka stranka), AAK - Aleanca për Ardhmërinë e Kosovës, Nisma - Nisma Socialdemokrate, Lista Konservatore, Forumi intelektual - E- 30, Koalicioni për Familje, PDAK-LPB, Koalicija Vakat. Nisma Qytetare: Narodna Pravda, Opre Roma Kosova.
Kandidat i pavarur: Fatmir Bytyqi
KQZ-ja duhet t’i konfirmojë listat më së voni deri më 25 dhjetor.
Zgjedhjet e 9 shkurtit do të jetë zgjedhjet e para të rregullta parlamentare që do të organizohen në Kosovë, që nga shpallja e pavarësisë më 2008.
Për një kohë të gjatë, partitë opozitare kishin kërkuar mbajtjen e zgjedhjeve të parakohshme, por më herët gjatë këtij viti dështuan të arrinin pajtim se si të shkohet në zgjedhje.
Në fund të majit dështoi një nismë e subjektit më të madh opozitar, Partia Demokratike e Kosovës, që në zgjedhjet të shkohet përmes shpërndarjes së Kuvendit.
Kjo mundësi u kundërshtua nga dy partitë e tjera opozitare, Lidhja Demokratike e Kosovës dhe Aleanca për Ardhmërinë e Kosovës, të cilat kërkuan që Qeveria e udhëhequr nga Albin Kurti të jepte dorëheqje apo të shkarkohej. Por, këto dy kërkesa u kundërshtuan nga Lëvizja Vetëvendosje e Kurtit.
