Si po trajtohet rasti i Deharit nga partia në pushtet?
Qasja e kryeministrit Kurti ndaj rastit të Astrit Deharit, po kritikohet nga njohësit e sistemit të drejtësisë. Madje si ndërhyrje, i cilësoi sistemi prokurorial deklarimet e Kurtit në Kuvendin e Kosovës për punën e prokurorisë në zbardhjen e rastit.
“Me qeverinë e re do të krijohet mundësia për të pasur drejtësi për Astritin, sepse kjo është drejtësi për shtetin tonë.”
Para se të formohej Qeveria Kurti I, kështu deklaronte Albin Kurti.
E në fund të mandatit të Qeverisë Kurti II, fati i zbulimit të këtij rasti, iu la sistemit të drejtësisë.
“Qeveria e Republikës së Kosovës, nuk mund ta bëjë edhe prokurorinë edhe gjyqësinë. Prokuroria duhet ta zbardhë rastin e shokut tonë të mbytur në burgun e Prizrenit, më 5 nëntor 2016, Astrit Deharin”, ka deklaruar Kurti.
Ndaj kësaj reagoi menjëherë Këshilli Prokurorial dhe Zyra e Kryeprokurorit të shtetit, duke e quajtur qasje e cila e dëmton funksionimin e sistemit.
“Deklaratat e Kryeministrit për raste individuale, duke i interpretuar ato në mënyrën e tij dëshirore, pa i ditur faktet dhe duke e keqinformuar publikun në mënyrë të qëllimshme, lëndojnë ndjenjat e familjarëve të të ndjerëve, përbëjnë ndërhyrje dhe presion të drejtpërdrejtë në punën e Prokurorisë dhe cenojnë rëndë pavarësinë e sistemit të drejtësisë. Një qasje e tillë e Kryeministrit të Republikës së Kosovës dëmton funksionimin e institucioneve demokratike dhe ka për qëllim minimin e reputacionit të Prokurorit të Shtetit në përpjekjet institucionale për forcimin e sundimit të ligjit në Republikën e Kosovës”, thuhet në reagim.
Në lidhje me rastin Dehari, sipas avokatit Xhevdet Smakiqi, sistemi i drejtësisë në Kosovë ka bërë atë se çfarë ka pasur në dorë.
“Prokuroria dhe hetuesia e Kosovës, në rastin e Astrit Deharit, i ka kryer të gjitha veprimet. Dhe nuk mundet as prokurori ta arrestojë dikë vetëm për qefin e dikujt apo për politikën e dikujt. …. Nuk mund t’i thoni dikujt që ta arrestojë dikë, pa pasur fakte dhe prova. Pra, edhe sikur Albin Kurti të ishte prokuror i rastit në vend të prokurorit aktual, nuk do të kishte mundësi ta arrestonte Albin Kurtin që është në politikë”, ka deklaruar ai.
Në këtë mes, Qeveria konsiderohet se duhet të rrijë larg deklaratave që ndërhyjnë në punët e drejtësisë.
“Në dorën e Qeverisë është që të kërkojë që rasti të zbardhet dhe të ndihmojë, e të mbështes sistemin e drejtësisë me aq sa ka mundësi dhe kompetencë ligjore. Dhe jo të ndërhyjë dhe të bëjë presione të formave të ndryshme, e ta politizojë një vrasje e cila akoma nuk ka marrë epilog”, ka thënë Anton Ndrecaj nga Instituti Clard.
Teve1 ka provuar të marrë qëndrim edhe nga avokati i familjes Dehari, por nuk ka qenë i qasshëm gjatë ditës.
