Kalaja e Prizrenit, nga tani në pulla postare të Kosovës

Posta e Kosovës, përmes filatelisë së saj, ka lëshuar sot në qarkullim një emision të ri pullash postare me temën “Kalaja e Prizrenit”.

Posta ka njoftuar se ky emision është një nderim për një nga monumentet më të rëndësishme historike dhe kulturore të Kosovës dhe synon të promovojë trashëgiminë kombëtare dhe vlerat kulturore që kjo kala përfaqëson.

“Kalaja e Prizrenit, e ndërtuar që në periudhën antike, ka luajtur një rol të rëndësishëm në mbrojtjen dhe forcimin e qytetit gjatë shumë periudhave historike, përfshirë ato të Perandorive Romake, Bizantine dhe Osmane. Ajo ka një histori të pasur dhe një ndikim të thellë në zhvillimin e rajonit. Muret e saj të forta prej guri dhe pozita e saj strategjike ofrojnë një pamje panoramike të qytetit dhe luginës së lumit Lumbardhi, duke e bërë atë një atraksion turistik të veçantë dhe një simbol të historisë dhe trashëgimisë kulturore të Kosovës”.

“Për më tepër, Kalaja e Prizrenit ka qenë dhe vazhdon të jetë një qendër për aktivitete kulturore dhe artistike, duke ofruar një hapësirë për ngjarje të ndryshme, si ekspozita, koncerte dhe festivale, që e lidhin kalanë me të tashmen dhe ndihmojnë në ruajtjen e traditave të pasura të vendit”, thuhet në njoftim.

Tutje Posta e Kosovës thotë se ky emision i ri i pullave postare është një mundësi për qytetarët, koleksionistët dhe bizneset që të kontribuojnë në ruajtjen dhe përhapjen e këtij simboli të trashëgimisë kulturore të Kosovës.

“Posta e Kosovës fton gjithashtu të gjithë ata që merren me filatelinë të përfitojnë nga ky emision unik, duke shtuar një pjesë të rëndësishme të historisë së vendit në koleksionet e tyre”.

“Përveç funksionit të saj si mjet komunikimi, kjo pullë postare ka një rëndësi të veçantë si një testament i vlerave kulturore dhe historike të Kosovës”, thuhet në njoftim. /Zëri