PDK-ja s’do të marrë pjesë në seancën e thirrur për adresimin vjetor të presidentes Osmani

Grupi Parlamentar i Partisë Demokratike të Kosovës refuzon edhe këtë vit pjesëmarrjen në seancën e thirrur për adresimin vjetor të presidentes Vjosa Osmani, ngase, sipas PDK-së, e njëjta ka vazhduar të sillet me mospërmbushje shqetësuese të rolit dhe funksionit të saj kushtetues.

“Znj. Osmani si presidente, duke qenë njëkohësisht edhe udhëheqëse e politikës së jashtme ka dështuar përfundimisht në realizimin e ndonjë suksesi të vetëm në përfaqësimin dhe bashkëpunimin ndërkombëtar të Kosovës. Si presidente, nuk ka arritur që Kosovës t’i sigurojë qoftë edhe një njohje të vetme, siç ka dështuar në fushën e anëtarësimit të vendit në ndonjë organizatë ndërkombëtare”.

“Për më tepër, si presidente ka vazhduar të qëndrojë e heshtur ndaj masave dhe sanksioneve që BE-ja ia ka vënë Kosovës si rezultat i qasjes destruktive të Qeverisë dhe në asnjë rast të vetëm nuk është sjellë dhe nuk ka vepruar si kundërbalancuese e politikave të gabuara të Qeverisë, të cilat vendin e kanë ekspozuar përballë izolimit ndërkombëtar”.

“Znj. Osmani edhe në vitin e katërt të mandatit të saj, ka vazhduar të sillet në mospërputhje të plotë me rolin e saj kushtetues për të përfaqësuar unitetin e popullit duke demonstruar njëanshmëri ndaj Albin Kurtit”, thuhet në njoftimin e PDK-së.

Ndërkaq, sipas PDK-së, edhe si komandante supreme e Forcës së Sigurisë së Kosovës, ka heshtur përballë skandalit të pashembullt të dështimit të sigurimit të ushqimit për ushtrinë tonë.

“Nga ana tjetër, ka vazhduar të hesht edhe përballë aferave të vazhdueshme korruptive të qeverisë, siç nuk e ka marrë asnjë edhe një masë për shkarkimin e protagonistit të aferës së energjisë, ambasadorit Martin Berishaj, vendimi për emërimin e të cilit e mban vulën e saj. Për më keq, ka vazhduar ta mbroj ambasadorin Berishaj dhe çdo skandal tjetër që ka ndodhur gjatë këtij viti”.

“Edhe këtë vit, jo vetëm që i ka mbyllur sytë përballë skandaleve dhe aferave korruptive të kësaj qeverie, por i është bashkuar fushatës qeveritare për të sulmuar institucionet e pavarura të drejtësisë dhe në rastin më të keq ka vazhduar shkeljen e saj kushtetuese për mosdekretimin e Kryeprokurorit të Shtetit”.

“Praktikisht në vend se të mbështeste në mënyrë institucionale pavarësinë dhe integritetin e institucioneve të drejtësisë, ajo ka penguar punën e tyre, duke penguar kështu edhe luftën kundër korrupsionit dhe dukurive negative”, thotë PDK-ja.

Sipas PDK-së, Osmani ka dështuar për të lënë një gjurmë të vetme të suksesshme për Kosovën, ndërsa thonë se roli i saj tërësisht i pavërejtshëm është kthyer në një faktor të dëmshëm për shtetin e Kosovës dhe qytetarët e saj.

“Fatkeqësisht, kontributi i vetëm i saj në këto katër vite është zbehja e rolit dhe rëndësisë së institucionit të Presidentit si dhe promovimi i gjuhës polarizuese dhe përçarëse në skenën politike”

“Një presidente e tillë e cila e redukton pozitën e Institucionit të Presidentit si një mekanizëm për akomodimin e interesave familjare dhe partiake nuk e meriton respektin e Grupit Parlamentar të PDK-së”, thotë PDK-ja. /Zëri