Kajtazi: Ekipi i Forenzikës s’ka arritur ta hapë pajisjen që më është gjetur në makinë

Gazetari Vehbi Kajtazi ka dalë me disa informacione të fundit rreth një pajisjeje që iu gjet javën e kaluar e vendosur në makinë.

Sipas njoftimeve më parë, ajo ishte pajisje që përgjon vendndodhjen e një personi.

Kajtazi thotë se sot është njoftuar se ekipi i Forenzikës e ka dorëzuar raportin për këtë pajisje në Policinë e Kosovës.

Thotë se ata nuk kanë arritur ta hapin pajisjen për të parë në hollësi se çka ka brenda saj.

Njoftimi i plotë i Kajtazit, pa ndërhyrje:

Të nderuar miq,

Ekipi i Forenzikës i Policisë së Kosovës sot ka dorëzuar raport në Prokurori të Shtetit për pajisjen e përgjimit të vendosur në veturën time.

Raporti i ekspertizës konstaton se ekspertët tanë nuk kanë mundur ta hapin atë pajisje. Ata sugjerojnë që pajisja të dërgohet jashtë vendit.

Pres që Prokuroria ta kryejë punën e saj në mënyrë të pavarur dhe profesionale. Nuk do të dorëzohem derisa të zbulohet se kush më ka përgjuar dhe persekutuar tash e sa kohë.