Reutersi raporton se çfarë pozite mund të marrë Grenelli në administratën e Trumpit

Donald Trump pritet të nisë procesin e përzgjedhjes së kabinetit dhe të zyrtarëve të tjerë të lartë të administratës në javët e ardhshme, pas fitores në zgjedhjet presidenciale të nëntorit.

Sipas agjencisë Reuters, Richard Grenell pritet të marrë një post në administratën e re republikane.

Grenell ka qenë një nga këshilltarët më të afërt të Trumpit për çështjet e politikës së jashtme. Gjatë mandatit të parë katërvjeçar të presidentit të sapozgjedhur, ai ka shërbyer si drejtor i përkohshëm i Inteligjencës Kombëtare dhe ambasador në Gjermani.

Në një takim të shtatorit me presidentin ukrainas Volodymyr Zelenskiy, Trump e përfshiu Grenellin në një takim privat, transmeton Telegrafi.

Marrëdhëniet e ngushta të Grenellit me liderët e huaj dhe personaliteti i tij shpeshherë i paparashikueshëm e kanë bërë atë një figurë të diskutueshme, çka mund të përbëjë një sfidë të re për konfirmimin e tij nga Senati.

Megjithatë, ai konsiderohet si një kandidat kryesor për rolin e Këshilltarit të Sigurisë Kombëtare, një pozicion që nuk kërkon konfirmimin e Senatit, edhe pse nuk përjashtohet mundësia për një post që kërkon konfirmim nga Senati.

Ndër politikat që ai ka mbështetur është krijimi i një zone autonome në Ukrainën lindore për t’i dhënë fund konfliktit atje, një ide që Kievi e sheh si të papranueshme.