Haradinaj e Limaj dakordojnë programin zgjedhor, paga mesatare 1 mijë euro, pensionet 500 euro
Kreu i AAK-së, Ramush Haradinaj, ka bërë të ditur se bashkë me Fatmir Limajn dhe partnerët e tjerë të koalicionit kanë dakorduar programin zgjedhor 2024-2029. Siç ka shkruar Haradinaj, shtylla kryesore e programit është anëtarësimi në NATO, zhvillimi ekonomik e pagat.
Sa i përket pagave, Haradinaj ka treguar se paga mesatare s’do të jetë nën 1 mijë euro dhe pensionet do të jenë 500 euro, në nivel të pagës minimale.
“Sot me kolegët, Fatmir Limaj, Artan Nimani dhe Abdullah Klinaku, partnerë të koalicionit AAK, Nisma, Demokracia Konservatore dhe Forumi Intelektual E-30, e dakorduam programin zgjedhor 2025-2029, që ndër shtyllat kryesore të tij ka anëtarësimin direkt në NATO, zhvillimin ekonomik, konsolidimin demokratik e institucional, paga mesatare që nuk do të jenë nën 1000 euro e pensione në nivel të pagës minimale prej 500 eurosh, si dhe familjen si shtyllë të shoqërisë”, ka shkruar Haradinaj.
“Po ashtu, e diskutuam edhe listën e kandidatëve për deputetë, përbërja e së cilës garanton cilësi e gjithëpërfshirje dhe një ekip kompetent për të realizuar synimet tona programore e elektorale”, ka shkruar Haradinaj.
