Gashi për marrëveshjet ndërkombëtare: I përkrahim dhe do t’i kalojmë për aq sa varet nga ne

Shefi i Grupit Parlamentar të LDK-së, Arben Gashi, në deklarimin pas mbledhjes së Kryesisë së Kuvendit ka folur për marrëveshjet ndërkombëtare.

Ai është shprehur se LDK-ja e konfirmon se qëndron pranë vendimit të saj që marrëveshjet ndërkombëtare i përkrah dhe do t’i kalojë ato, siç u shpreh ai, për aq sa varet nga ta, përcjell klankosova.

“U dakorduam që të kemi dy seanca gjatë javës, por mbetet të shihet nëse Lëvizja Vetëvendosje ka votat e nevojshme për të kaluar vendimet, të cilat merren me shumicë të thjeshtë”.

“Sa u përket vendimeve që merren me shumicë të kualifikuar që janë marrëveshjet ndërkombëtare, Lidhja Demokratike e Kosovës e ka deklaruar dhe e konfirmon se qëndron pranë vendimit të saj që marrëveshjet ndërkombëtare i përkrah dhe do t’i kalojë ato për aq sa varet nga Lidhja Demokratike e Kosovës”, është shprehur tutje Gashi.