Arrestimi i Ilir Metës, vjen reagimi i parë i Edi Ramës

Kryeministri Edi Rama ka reaguar për herë të parë lidhur me çështjen e arrestimit të Ilir Metës, duke theksuar se kjo është një çështje që i përket drejtësisë.

Në një konferencë për mediat të mbajtur së bashku me Presidenten e Komisionit Evropian, Ursula von der Leyen, Rama refuzoi të japë komente të mëtejshme për këtë çështje.

“As unë dhe as forca politike që unë udhëheq nuk bëjnë komente për çështje që i takojnë drejtësisë. Kur çështjet përmbyllen, ndoshta në ndonjë rast ia vlen të bëhet ndonjë koment, veçanërisht kur drejtësia vihet në vend për fenomene katastrofike për shoqërinë, siç është shpifja. Në rastin konkret, kjo është një çështje që i takon drejtësisë”, deklaroi Rama.

Nga ana e saj, Ursula von der Leyen, provoi t’iu shmang komenteve mbi procedurat gjyqësore.

“Nuk do të komentoj mbi raste gjyqësore individuale. Ne bashkëpunojmë me Shqipërinë për reformën gjyqësore, por kjo nuk ka të bëjë me raste të veçanta”, u shpreh Leyen.