Serbia mundohet ta fajësojë Kosovën për futjen e xhandarmërisë serbe në kufi
Serbisë nuk i mjaftojnë faktet me video dhe pamje të xhandarmërisë serbe në kufi me Kosovën.
Secilën herë që ajo provokon ose shkel marrëveshjen duke dërguar ushtri ose xhandarmëri përreth Kosovës, lëshohet në dezinformata.
Kështu ka vepruar edhe këtë herë. Shefi i të ashtuquajturës Zyra për Kosovën në qeverinë e Serbisë Petar Petkoviq u mundua që lajmin për praninë e xhandarmërisë serbe në kufirin e Kosovës ta zbeh, duke lëshuar akuza.
Ai si zakonisht fajin për gjithçka ia hedh Kosovës.
“Prishtina shkel çdo ditë marrëveshjet e ndërmjetësuara nga BE, dhe guxon të sulmojë Beogradin me pretendime të fabrikuara, për shkelje të marrëveshjes për menaxhimin e integruar të kufirit”, ka pretenduar Petkoviqi.
Shefi i të ashtuquajturës Zyra për Kosovën në qeverinë e Serbisë, tha se Prishtina është një partner jo i besueshëm dhe i paqëndrueshëm në dialog që përdor mashtrimin për të mbuluar mosveprimet.
Sipas tij është Prishtina që prej më shumë se një viti po shkel marrëveshjen për menaxhimin e integruar të kufirit, pari pengoi hyrjen e mallrave serbe.
“Prishtina edhe pas gjoja zhbllokimit të pikëkalimit në Merdar, brutalisht vazhdon të shkelë të gjitha marrëveshjet. Ajo po mban të bllokuar më shumë se 100 kamionë me mallra në këtë vendkalim, duke u fshehur pas procedurave të sajuara dhe të pakuptimta”, deklaroi Petkoviqi.
KFOR-i do të vazhdojë të marrë të gjitha masat që konsiderohen të nevojshme për të ruajtur stabilitetin dhe për të parandaluar rreziqet e tensioneve dhe dhunës së përtërirë.
Kështu kanë deklaruar nga KFOR-i, pas raportimit të së hënës nga Policia e Kosovës se xhandarmëria serbe e ka shkelur vijën ndarëse kufitare mes Serbisë dhe Kosovës.
Me këtë rast, Policia e Kosovës kërkoi nga autoritetet relevante ndërkombëtare që të ndërmarrin veprime të nevojshme për ruajtjen e stabilitetit dhe respektimin reciprok të marrëveshjeve që ndërlidhen me menaxhimin e integruar kufitar dhe me sigurinë në përgjithësi.
Nga KFOR-i thënë se pjesëtarët e këtij misioni monitorojnë nga afër situatën përgjatë kufirit, “Nëpërmjet pranisë sonë të shtuar, patrullimeve dhe aktiviteteve të vëzhgimit”.
“Jemi në kontakt të rregullt me përfaqësues të organizatave të sigurisë së Kosovës dhe të Forcave të Armatosura të Serbisë”, ka thënë nga KFOR-i në një përgjigjen për Klankosova
Më tej, ky mision paqeruajtës i NATO-s në Kosovë tha se koordinimi dhe përmbajtja nga veprimet që mund të çojnë në tensione “është e rëndësishme për të ruajtur sigurinë në mbarë Kosovën dhe stabilitetin rajonal”.
KFOR-i siguroi se pjesëtarët e tij janë të vendosur mirë “për të siguruar që do të vazhdojmë të kontribuojmë për një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme”.
Policia në njoftimin e djeshëm të orëve të vonshme tha se më datë 14.10.2024, rreth orës 18:20, “tek pala serbe në stacionin policor kufitar në Merdar është vërejtur një veturë e tipit Land-Rover me targa të Serbisë që dyshohej të jetë e xhandarmërisë serbe”.
“Sipas informacioneve nga kompetentët aty shiheshin 4 (katër) pjesëtarë të xhandarmërisë serbe të cilët kanë qëndruar rreth 10 (dhjetë) minuta tek hyrja e objektit te pala serbe. Të njëjtit janë larguar duke shkelur vijën ndarëse kufitare që në fakt përbënë shkelje të marrëveshjes për IBM-në, ka për qëllim provokimin apo krijimin e ndonjë incidenti ndërshtetëror”, tha Policia.
